خطر ٹل گیا، خمیس مشیط میں حالات معمول پر آ گئے

سعودی سول ڈیفنس کی جنرل ڈائریکٹوریٹ نے ہفتہ کے روز اعلان کیا ہے کہ خمیس مشیط میں وہ خطرہ ختم ہو گیا ہے جس کے باعث ابتدائی وارننگ سائرن بجائے گئے تھے۔ حکام نے بتایا کہ علاقے میں حالات معمول پر آ چکے ہیں، تاہم شہریوں کو عمومی سلامتی کے پیش نظر حفاظتی ہدایات پر عمل جاری رکھنے کی ہدایت کی گئی ہے۔

اس سے قبل سول ڈیفنس کی جانب سے سائرن بجائے گئے تھے اور شہریوں کو ہدایت کی گئی تھی کہ وہ ہجوم بنانے یا کسی قسم کی ویڈیو یا تصاویر لینے سے مکمل گریز کریں اور افواہوں پر کان نہ دھریں۔

محکمے نے واضح کیا کہ قومی وارننگ پلیٹ فارم سے موصول ہونے والے انتباہی پیغامات پر شہریوں کو چاہیے کہ وہ پرسکون رہیں اور سرکاری ہدایات پر عمل کریں۔ ساتھ ہی مشورہ دیا گیا کہ خطرے کی صورت میں فوراً کسی محفوظ عمارت یا اندرونی کمرے میں چلے جائیں اور کھڑکیوں سے دور رہیں، جب تک خطرہ مکمل طور پر ختم نہ ہو جائے۔

سول ڈیفنس نے یہ بھی کہا کہ خطرہ ختم ہونے تک گھر یا عمارت سے باہر نہ نکلیں، کھلی جگہوں اور شیشے کے قریب جانے سے گریز کریں اور بالکونی یا چھت پر ہرگز نہ جائیں۔ اگر آپ باہر موجود ہوں تو قریبی عمارت میں پناہ لیں یا کسی مضبوط دیوار کے پیچھے چھپ جائیں۔

مزید یہ کہ شہریوں کو ہدایت کی گئی ہے کہ ہجوم نہ بنائیں، تصاویر یا ویڈیوز نہ بنائیں اور خطرناک مقامات سے دور رہیں۔ اگر انتباہی پیغام ڈرائیونگ کے دوران موصول ہو تو گاڑی کو سڑک کے کنارے روکیں، پلوں اور بلند عمارتوں سے دور رہیں۔ کسی بھی خطرے کی صورت میں مکہ مکرمہ، مدینہ منورہ، ریاض اور مشرقی ریجن میں ہنگامی نمبر (911) اور باقی علاقوں میں (998) پر رابطہ کریں اور سرکاری ذرائع سے ہدایات پر عمل کریں۔