بدھ کو مختلف علاقوں میں گرج چمک کے ساتھ بارش اور ژالہ باری کا امکان

محکمہ موسمیات نے اپنی رپورٹ میں بتایا ہے کہ آج بدھ کو جازان، عسیر، باحہ، مکہ مکرمہ اور مدینہ منورہ کے کچھ حصوں میں درمیانے سے شدید درجے کی گرج چمک کے ساتھ بارشیں متوقع ہیں، جن سے سیلابی صورتحال پیدا ہو سکتی ہے۔ ان بارشوں کے ساتھ ژالہ باری اور تیز ہوائیں بھی چلیں گی جو گرد و غبار کا باعث بن سکتی ہیں۔

رپورٹ میں مزید کہا گیا ہے کہ مکہ مکرمہ، مدینہ منورہ اور مشرقی ریجن کے ساحلی علاقوں میں دھند چھانے کا بھی امکان ہے۔

بحر احمر میں سطحی ہوائیں شمال مغرب سے شمال کی سمت 12 سے 40 کلومیٹر فی گھنٹہ کی رفتار سے چلیں گی۔ درمیانی حصے میں ہوائیں شمال مغرب سے جنوب مغرب کی سمت ہوں گی جو دوپہر کے بعد مغرب سے شمال مغرب کی طرف بدل جائیں گی اور ان کی رفتار 12 سے 35 کلومیٹر فی گھنٹہ ہوگی۔ جنوبی حصے میں ہوائیں جنوب مشرق سے جنوب مغرب کی سمت ہوں گی جو دوپہر کے بعد شمال مغرب سے شمال مشرق کی طرف بدل جائیں گی اور ان کی رفتار 10 سے 32 کلومیٹر فی گھنٹہ ہوگی، جبکہ گرج چمک کے ساتھ بارش کے دوران رفتار 50 کلومیٹر فی گھنٹہ سے تجاوز کر سکتی ہے۔ سمندر کی لہریں آدھے میٹر سے ڈیڑھ میٹر تک بلند ہوں گی اور گرج چمک کے ساتھ بارش کے دوران دو میٹر سے بھی زیادہ ہو سکتی ہیں۔ اس دوران سمندر کی کیفیت ہلکی سے درمیانی اور بارش کے دوران تیز لہروں والی ہو سکتی ہے۔

خلیج عرب میں سطحی ہوائیں شمال مغرب سے جنوب مغرب کی سمت 10 سے 28 کلومیٹر فی گھنٹہ اور شمال مشرق سے شمال مغرب کی سمت 8 سے 25 کلومیٹر فی گھنٹہ کی رفتار سے چلیں گی۔ لہریں آدھے میٹر سے ایک میٹر تک بلند ہوں گی اور سمندر کی کیفیت ہلکی لہروں والی رہے گی۔