مملکت کے مختلف علاقوں میں ہفتے تک گرج چمک کے ساتھ بارشیں، شہریوں کو احتیاط کی ہدایت

محکمہ دفاع مدنی نے مملکت کے مختلف علاقوں میں رہنے والے شہریوں اور مقیمین سے اپیل کی ہے کہ وہ احتیاط اور ہوشیاری سے کام لیں، محفوظ مقامات پر رہیں، سیلابی پانی کے جمع ہونے والے مقامات اور وادیوں سے دور رہیں اور ان میں تیراکی سے گریز کریں۔ اس کے علاوہ میڈیا اور سوشل میڈیا پر جاری کردہ ہدایات پر عمل کریں، کیونکہ گرج چمک کے ساتھ بارشوں کا سلسلہ ہفتے تک جاری رہے گا۔

قومی مرکز برائے موسمیات کے مطابق، مکہ مکرمہ ریجن میں درمیانے سے شدید بارشیں متوقع ہیں جو سیلابی ریلوں، ژالہ باری اور تیز ہواؤں کا باعث بن سکتی ہیں۔ اس میں مقدس شہر اور متعدد اضلاع جیسے کامل، الجموم، طائف، میسان، اضم، العرضیات، بحرة، خلیص، جدہ، رابغ، تربہ، الخرمة، رنیہ، المویہ، القنفذہ اور اللیث شامل ہیں۔

مرکز نے مزید بتایا کہ ریاض ریجن میں بھی درمیانے سے شدید بارشیں ہوں گی جن سے سیلابی ریلے، ژالہ باری اور تیز ہوائیں اٹھنے کا امکان ہے۔ اس میں دارالحکومت ریاض اور دیگر علاقے جیسے ضرما، الدرعیہ، حریملاء، المزاحمیہ، الدلم، الحریق، الخرج، الرین، عفیف، الدوادمی، شقراء، ثادق، الغاط، الزلفی، المجمعة، رماح، مرات، القویعیہ اور حوطہ بنی تمیم شامل ہیں۔

مرکز نے مزید کہا کہ جازان، عسیر، الباحہ، مدینہ منورہ، حائل، قصیم، مشرقی ریجن اور نجران میں بھی درمیانے سے شدید بارشیں متوقع ہیں جن سے سیلابی ریلے، ژالہ باری اور تیز ہوائیں اٹھنے کا خدشہ ہے، جبکہ الجوف، شمالی حدود اور تبوک میں ہلکی سے درمیانے درجے کی بارشیں متوقع ہیں۔