اقوام متحدہ کو غزہ پر اسرائیلی حملوں پر تشویش

اقوام متحدہ کے مشرق وسطیٰ میں امن عمل کے نائب رابطہ کار رامز الاکبروف نے غزہ پر حالیہ اسرائیلی فضائی حملوں پر تشویش کا اظہار کیا ہے، جن کے نتیجے میں عام شہری جاں بحق ہوئے اور اہم طبی امداد و شہری انفراسٹرکچر کو نقصان پہنچا۔

رامز الاکبروف نے ایک بار پھر اس بات پر زور دیا کہ شہری اور انسانی تنصیبات کا تحفظ، انسانی امدادی سرگرمیوں میں سہولت اور تمام فریقین کی جانب سے بین الاقوامی قانون کے مطابق اپنی ذمہ داریاں نیک نیتی سے پوری کرنا ضروری ہے۔

اقوام متحدہ کے دفتر برائے انسانی امور کا کہنا ہے کہ "زرد لائن" کے قریب جاری فوجی کارروائیاں اور دیگر علاقوں میں ہونے والے فضائی حملے شہری زندگی کو متاثر کر رہے ہیں، پناہ گاہوں کو نقصان پہنچا رہے ہیں، نئی نقل مکانی کا سبب بن رہے ہیں اور بنیادی خدمات تک رسائی محدود کر رہے ہیں۔

تنظیم نے کہا ہے کہ وہ اور اس کے شراکت دار جہاں ممکن ہو، امداد فراہم کر رہے ہیں۔