آج منگل: درجہ حرارت میں اضافہ، تیز ہوائیں اور گرج چمک کے بادل

محکمہ موسمیات نے اپنی رپورٹ میں بتایا ہے کہ آج منگل کو مشرقی ریجن، ریاض، مدینہ منورہ اور مکہ مکرمہ کے کئی حصوں میں زیادہ سے زیادہ درجہ حرارت بلند رہے گا۔

رپورٹ میں مزید کہا گیا ہے کہ ان علاقوں سمیت شمالی سرحدی ریجن، الجوف، تبوک، حائل اور قصیم کے بعض حصوں میں تیز ہوائیں چلنے اور گرد و غبار اٹھنے کا سلسلہ جاری رہے گا۔ مغربی اور جنوب مغربی علاقوں کے پہاڑی سلسلوں اور نجران کے کچھ حصوں میں گرج چمک کے ساتھ بارش کے بادل بننے کا امکان بھی موجود ہے۔

رپورٹ کے مطابق بحیرہ احمر میں سطحی ہوائیں شمال مغرب سے مغرب کی سمت 12 سے 34 کلومیٹر فی گھنٹہ کی رفتار سے شمالی و وسطی حصوں میں چلیں گی، جبکہ وسطی حصے میں یہ رفتار 45 کلومیٹر فی گھنٹہ تک پہنچ سکتی ہے۔ جنوبی حصے میں ہوائیں جنوب مغرب سے شمال مغرب کی سمت 15 سے 32 کلومیٹر فی گھنٹہ کی رفتار سے چلیں گی اور گرج چمک کے بادل بننے پر یہ رفتار 50 کلومیٹر فی گھنٹہ تک پہنچ سکتی ہے۔ شمالی و جنوبی حصوں میں موجوں کی اونچائی نصف میٹر سے ڈیڑھ میٹر تک اور وسطی حصے میں ایک سے دو میٹر تک رہے گی، جبکہ جنوبی حصے میں گرج چمک کے بادل بننے پر دو میٹر سے بھی زیادہ ہو سکتی ہے۔ بحیرہ احمر میں مجموعی طور پر موجیں ہلکی سے درمیانی رہیں گی اور جنوبی حصے میں گرج چمک کے بادل بننے پر تیز ہو سکتی ہیں۔

خلیج عرب میں ہوائیں شمالی و وسطی حصوں میں جنوب مشرق سے مشرق کی سمت 15 سے 30 کلومیٹر فی گھنٹہ اور جنوبی حصے میں جنوب مشرق سے شمال مشرق کی سمت 10 سے 28 کلومیٹر فی گھنٹہ کی رفتار سے چلیں گی۔ موجوں کی اونچائی نصف میٹر سے ایک میٹر تک اور سمندر کی حالت ہلکی موجوں والی رہے گی۔