مسجد نبوی کی جدید چھتریاں: موسمی تحفظ کی نئی مثال

مسجد نبوی کی چھتریاں جدید ترین انجینئرنگ شاہکار ہیں جو خوبصورت ڈیزائن اور اعلیٰ کارکردگی کو یکجا کرتی ہیں۔ یہ چھتریاں نمازیوں اور زائرین کو سورج کی تیز روشنی اور بارش سے مؤثر تحفظ فراہم کرتی ہیں، جس سے عبادت اور مسجد کے اطراف میں آمدورفت ہر موسم میں آسان ہو جاتی ہے۔

مسجد نبوی کے گرد و نواح میں 250 متحرک چھتریاں نصب ہیں، جن کا مجموعی رقبہ ایک لاکھ 43 ہزار مربع میٹر سے زائد ہے۔ ہر چھتری کی لمبائی اور چوڑائی تقریباً 25.5 میٹر جبکہ اونچائی تقریباً 22 میٹر ہے اور ہر ایک کا وزن 40 ٹن کے قریب ہے۔ یہ چھتریاں مجموعی طور پر 2 لاکھ 28 ہزار سے زائد نمازیوں کو سایہ فراہم کرتی ہیں۔

بارش کے دوران یہ چھتریاں اہم کردار ادا کرتی ہیں اور وسیع سایہ دار جگہ فراہم کرتی ہیں تاکہ نمازی براہ راست بارش سے محفوظ رہیں۔ انہیں اس طرح ڈیزائن کیا گیا ہے کہ یہ ہوا، بارش اور آگ کے خلاف مزاحمت رکھتی ہیں اور پانی کے نکاس کے نظام سے مربوط ہیں تاکہ پانی جمع نہ ہو اور فرش پر پھسلن کا خطرہ کم ہو جائے۔

یہ چھتریاں جدید انجینئرنگ نظام کے تحت مخصوص آپریٹنگ یونٹس سے چلتی ہیں۔ سورج نکلتے ہی خودکار طور پر کھل جاتی ہیں اور غروب سے قبل بند ہو جاتی ہیں، جس سے سایہ کا زیادہ سے زیادہ فائدہ اور موسمی حالات کے مطابق سہولت ملتی ہے۔

اس نظام میں ماحول کو خوشگوار بنانے کے لیے 436 اسپرے پنکھے بھی نصب ہیں، جن میں سے ہر ایک میں 16 نوزل سے صاف پانی کا اسپرے ہوتا ہے۔ اس کے علاوہ ایک ہزار سے زائد روشنیاں نصب ہیں جو چوبیس گھنٹے نمازیوں اور زائرین کو بہترین سہولت فراہم کرتی ہیں۔

چھتریوں کے ڈھانچے میں فائبر گلاس اور کاربن سے مضبوط کی گئی دھاتی ستون اور بازو استعمال ہوئے ہیں۔ کچھ حصے موزیک نقش و نگار سے مزین ہیں اور سجاوٹی عناصر میں سونے کی ملمع کاری والا پیتل استعمال کیا گیا ہے، جس سے انجینئرنگ تقاضوں اور علاقائی جمالیات میں توازن برقرار رہتا ہے۔

یہ پورا نظام ایک مرکزی کنٹرول روم سے چلایا جاتا ہے، جہاں سے چھتریوں کی کارکردگی اور ضرورت کے مطابق ان کا انتظام کیا جاتا ہے، جس سے موسم کی تبدیلیوں پر فوری ردعمل ممکن ہوتا ہے۔