یونانی چیف آف اسٹاف کو وسام الملک عبدالعزیز سے نوازا گیا

ریاض میں چیف آف جنرل اسٹاف جنرل فیاض بن حامد الرویلی نے یونان کے چیف آف ڈیفنس جنرل دیمیتریوس ہوپیس کو وسام الملک عبدالعزیز (درجہ ممتاز) سے نوازا۔

یہ اعزاز خادم الحرمین الشریفین شاہ سلمان بن عبدالعزیز آل سعود، جو تمام افواج کے سپریم کمانڈر ہیں، کے حکم پر دیا گیا۔ اس کا مقصد جنرل دیمیتریوس ہوپیس کی سعودی یونانی دوستی مضبوط بنانے، باہمی تعاون اور تعلقات کے فروغ میں خدمات کا اعتراف ہے۔

اعزاز دینے کی تقریب ریاض میں سعودی چیف آف اسٹاف کی جانب سے یونانی ہم منصب کے استقبال کے موقع پر منعقد ہوئی، جس میں دونوں ملکوں کے درمیان دفاعی اور عسکری شعبوں میں تعاون اور اس کے فروغ کے امکانات پر تبادلہ خیال کیا گیا۔ اس کے علاوہ باہمی دلچسپی کے دیگر امور بھی زیر بحث آئے۔

استقبالیہ اور اعزاز دینے کی تقریب میں دونوں ممالک کے اعلیٰ افسران اور عہدیداروں نے شرکت کی۔