سعودی عرب: بیشتر علاقوں میں گرج چمک کے ساتھ بارش، شہریوں کو احتیاط کی ہدایت

محکمہ دفاع مدنی نے شہریوں اور مقیم غیر ملکیوں کو ہدایت کی ہے کہ وہ بیشتر علاقوں میں جمعے تک جاری رہنے والی گرج چمک کے ساتھ بارشوں کے دوران احتیاط اور ہوشیاری سے کام لیں۔

محکمہ نے زور دیا ہے کہ لوگ محفوظ مقامات پر رہیں، سیلابی ریلوں اور وادیوں سے دور رہیں اور ان میں تیراکی سے گریز کریں، نیز میڈیا اور سوشل میڈیا پر جاری ہدایات پر عمل کریں۔

قومی مرکز برائے موسمیات کے مطابق مکہ مکرمہ ریجن میں درمیانے سے شدید بارشیں متوقع ہیں جو سیلابی ریلوں اور ژالہ باری کا سبب بن سکتی ہیں، جبکہ تیز ہوائیں گرد و غبار بھی اٹھا سکتی ہیں۔ اس صورتحال سے مقدس شہر، کامل، الجموم، بحرة، طائف، میسان، اضم، العرضیات اور خلیص متاثر ہوں گے، جبکہ جدہ، رابغ، رنیہ، تربہ، الخرمة، المویہ، القنفذہ اور اللیث میں ہلکی سے درمیانی بارشیں متوقع ہیں۔

مرکز نے مزید بتایا کہ جازان، عسیر، الباحہ، مدینہ منورہ، حائل، القصیم، تبوک، الجوف، شمالی سرحدی علاقہ اور مشرقی ریجن میں بھی درمیانے سے شدید بارشیں متوقع ہیں جو سیلابی ریلوں، ژالہ باری اور گرد و غبار کا باعث بن سکتی ہیں۔