سعودی تیل تنصیبات پر حملے کی کوشش کی شام کی شدید مذمت

شام نے سعودی عرب میں تیل کی تنصیبات کو ڈرون کے ذریعے نشانہ بنانے کی کوشش کی شدید الفاظ میں مذمت کی ہے۔ یہ ڈرون ایرانی حمایت یافتہ ملیشیا نے عراقی سرزمین سے چھوڑے تھے۔ شام نے ان حملوں کو مملکت کے امن و استحکام کے خلاف سنگین خلاف ورزی اور خطے کی سلامتی کے لیے خطرہ قرار دیا ہے۔

شامی وزارت خارجہ و تارکین وطن نے سرکاری خبر رساں ایجنسی کے ذریعے جاری بیان میں سعودی عرب سے مکمل یکجہتی کا اظہار کیا اور مملکت کی سلامتی، خودمختاری اور سرحدوں کے تحفظ کے لیے کیے گئے تمام اقدامات کی حمایت کا اعادہ کیا۔ بیان میں ایک بار پھر ممالک کی خودمختاری کے احترام اور خطے کے امن و استحکام کو نقصان پہنچانے والی تمام کارروائیوں کی مخالفت پر زور دیا گیا۔