عرب پارلیمنٹ کی حوثی حملے کی مذمت

عرب پارلیمنٹ نے حوثی ملیشیا کی جانب سے مکہ مکرمہ کو ڈرون کے ذریعے نشانہ بنانے کی دہشت گردانہ کوشش کی شدید مذمت کی ہے، اور اسے مسلمانوں کے مقدس ترین مقام کی حرمت کی کھلی خلاف ورزی اور امت مسلمہ کے جذبات پر سنگین حملہ قرار دیا ہے۔

عرب پارلیمنٹ کے سربراہ محمد بن احمد الیمحی نے اپنے بیان میں کہا کہ مکہ مکرمہ کو نشانہ بنانا نہ صرف سعودی عرب کی سلامتی پر حملہ ہے بلکہ اسلامی مقدسات کی حرمت اور ضیوف الرحمن کی سلامتی کے لیے بھی خطرہ ہے۔ انہوں نے اس حوالے سے عالمی برادری سے واضح اور مؤثر موقف اختیار کرنے کا مطالبہ کیا۔

الیمحی نے مزید کہا کہ سعودی عرب کی سرزمین اور شہری تنصیبات پر حوثی ملیشیا کے مسلسل حملے بین الاقوامی قوانین اور انسانی حقوق کی کھلی خلاف ورزی ہیں۔ انہوں نے عالمی برادری سے فوری اور مؤثر اقدامات اٹھانے، ان حملوں کے ذمہ داران کو انصاف کے کٹہرے میں لانے اور ان کے مالی وسائل و حمایت کا سدباب کرنے کا مطالبہ کیا، تاکہ اس طرح کے واقعات دوبارہ نہ ہوں اور خطے کا استحکام برقرار رہے۔

اسی تناظر میں، عرب پارلیمنٹ کے سربراہ نے سعودی عرب کے ساتھ مکمل یکجہتی اور اس کی سلامتی، خودمختاری، ارضی سالمیت اور مقدسات کے تحفظ کے لیے ہر ممکن تعاون کی یقین دہانی کرائی۔ انہوں نے مکہ مکرمہ کے تحفظ اور شہریوں، مقیمین اور زائرین حرم کی سلامتی کے لیے سعودی حکومت کے اقدامات کی بھرپور حمایت کا اعادہ کیا۔