ریاض میں نجم الدین ایوبی چوراہے پر پلوں کی تعمیر کا آغاز

ریاض کی شاہی اتھارٹی نے جدہ روڈ کی ترقیاتی منصوبے کے ابتدائی مراحل میں نجم الدین ایوبی چوراہے پر پلوں کی تعمیر کا آغاز کر دیا ہے۔

شاہی اتھارٹی نے اپنے ایکس اکاؤنٹ پر بتایا کہ اس منصوبے میں دونوں سمتوں میں ٹریفک کی روانی کے لیے دو مرکزی پلوں کے علاوہ دو یوٹرن پل بھی شامل ہیں، جو ٹریفک کی روانی بہتر بنانے اور اہم شاہراہوں کے درمیان ربط کو مضبوط بنانے میں معاون ہوں گے۔

اتھارٹی کے مطابق جدہ روڈ کی ترقی کا منصوبہ 29 کلومیٹر طویل ہے، جس میں 14 پلوں کی تعمیر، ہر سمت میں پانچ مرکزی لینز کی توسیع شامل ہے، جس سے اس کی یومیہ گنجائش 350 ہزار سے زائد گاڑیوں تک بڑھ جائے گی۔ اس کے علاوہ پیدل چلنے والوں کے لیے پل بھی بنائے جائیں گے تاکہ ٹریفک کی حفاظت کو یقینی بنایا جا سکے۔

جدہ روڈ کی ترقی کا یہ منصوبہ ریاض میں دائرہ جاتی اور مرکزی شاہراہوں کی بہتری کے پروگرام کا حصہ ہے، جسے شاہی اتھارٹی نے شروع کیا ہے۔ اس پروگرام کا مقصد دارالحکومت میں 500 کلومیٹر سے زائد سڑکوں کے نیٹ ورک کو بہتر بنانا، موجودہ شاہراہوں کی کارکردگی بڑھانا اور نئے راستے بنانا ہے، تاکہ شہر کی تیز رفتار ترقی کے ساتھ ہم آہنگ، مربوط اور پائیدار شہری ٹرانسپورٹ نظام تشکیل دیا جا سکے اور معیارِ زندگی بلند ہو۔

اعرض التغريدة على منصة X