ماحولیاتی قوانین کی خلاف ورزی: 45 اونٹ چرا کر شہری گرفتار

خصوصی فورس برائے ماحولیاتی تحفظ نے ایک شہری کو امام ترکی بن عبداللہ شاہی ریزرو میں ممنوعہ مقامات پر 45 اونٹ چرانے کے الزام میں گرفتار کر لیا ہے اور اس کے خلاف قانونی کارروائی کی جا رہی ہے۔

فورس کے مطابق ممنوعہ مقامات پر اونٹ چرانے کی خلاف ورزی پر فی اونٹ 500 سعودی ریال جرمانہ عائد کیا جاتا ہے۔

فورس نے واضح کیا کہ محفوظ علاقوں اور جنگلی حیات کے تحفظ کے لیے ماحولیاتی قوانین کی پابندی ضروری ہے اور شہریوں سے اپیل کی ہے کہ وہ ماحول یا جنگلی حیات پر کسی بھی قسم کے حملے کی اطلاع دیں۔

خصوصی فورس برائے ماحولیاتی تحفظ نے بتایا کہ مکہ مکرمہ، مدینہ منورہ، ریاض اور مشرقی ریجن میں شکایات کے لیے 911 جبکہ دیگر علاقوں میں 999 اور 996 پر رابطہ کیا جا سکتا ہے۔ فورس نے یقین دہانی کرائی ہے کہ تمام شکایات کو مکمل رازداری کے ساتھ نمٹایا جائے گا اور اطلاع دینے والے پر کوئی ذمہ داری عائد نہیں ہو گی۔