سعودی عرب: بیشتر علاقوں میں موسلا دھار بارشوں پر شہریوں کو احتیاط کی ہدایت

محکمہ دفاع مدنی نے شہریوں اور مقیمین کو ہدایت کی ہے کہ وہ گرج چمک کے ساتھ ہونے والی بارشوں کے پیش نظر احتیاط برتیں، محفوظ مقامات پر رہیں اور سیلابی پانی یا وادیوں کے قریب جانے اور وہاں تیرنے سے گریز کریں۔ یہ بارشیں مملکت کے بیشتر علاقوں میں بدھ تک جاری رہیں گی۔

محکمہ نے زور دیا ہے کہ شہری اور مقیمین اپنی سلامتی کے لیے میڈیا اور سوشل میڈیا کے ذریعے جاری کردہ ہدایات پر عمل کریں۔

متاثرہ علاقوں کے لیے محکمہ موسمیات کی پیش گوئیاں

قومی مرکز برائے موسمیات کے مطابق، مکہ مکرمہ ریجن میں درمیانے سے شدید بارشیں متوقع ہیں، جن سے سیلابی ریلے، ژالہ باری اور گرد و غبار کے ساتھ تیز ہوائیں چل سکتی ہیں۔ اس صورتحال سے مقدس شہر، کامل، الجموم، بحرة، طائف، میسان، اضم اور العرضیات متاثر ہوں گے، جبکہ اللیث، القنفذہ، جدہ، رابغ، خلیص، رنیہ، الخرمة، المویہ اور تربہ میں ہلکی سے درمیانی بارشیں متوقع ہیں۔

مرکز نے مزید بتایا کہ جازان، عسیر، الباحہ، تبوک، الجوف اور شمالی سرحدی علاقے بھی درمیانے سے شدید بارشوں کی لپیٹ میں آ سکتے ہیں، جس سے سیلابی ریلے، ژالہ باری اور گرد و غبار کے ساتھ تیز ہوائیں چلنے کا امکان ہے۔ مدینہ منورہ، حائل اور نجران میں بھی ہلکی سے درمیانی بارشیں متوقع ہیں۔

یاد رہے کہ متعلقہ ادارے موسمی صورتحال کی مسلسل نگرانی کر رہے ہیں اور عوامی سلامتی سے متعلق ہدایات کو اپ ڈیٹ کرتے رہتے ہیں۔