سعودی عرب کے مختلف علاقوں میں آج بارش اور سیلاب کا امکان

قومی مرکز برائے موسمیات نے جمعہ کو اپنی رپورٹ میں بتایا ہے کہ آج جازان، عسیر، الباحہ، مکہ مکرمہ اور مدینہ منورہ کے کچھ حصوں میں درمیانے سے شدید درجے کی گرج چمک کے ساتھ بارش متوقع ہے، جو سیلاب کا سبب بن سکتی ہے۔ اس کے ساتھ تیز ہوائیں، گرد و غبار اور ژالہ باری کا بھی امکان ہے۔

رپورٹ میں مزید کہا گیا ہے کہ مذکورہ علاقوں کے کچھ حصوں اور مشرقی ریجن کے ساحلی علاقوں میں دھند بننے کا بھی امکان ہے۔

اسی طرح، نجران کے بعض حصوں میں بھی گرج چمک کے ساتھ بارش اور تیز ہواؤں کے امکانات کو رد نہیں کیا جا سکتا۔

سمندر اور ہواؤں کی صورتحال

مرکز کے مطابق بحیرہ احمر میں سطحی ہوائیں شمال مغرب سے 15 سے 38 کلومیٹر فی گھنٹہ کی رفتار سے چلیں گی، جب کہ موجوں کی اونچائی آدھے میٹر سے ڈیڑھ میٹر تک ہوگی اور سمندر کی حالت ہلکی سے درمیانی رہے گی۔

خلیج عرب میں سطحی ہوائیں شمال یا شمال مغرب سے 10 سے 28 کلومیٹر فی گھنٹہ کی رفتار سے چلیں گی، موجوں کی اونچائی آدھے میٹر سے ایک میٹر تک ہوگی اور سمندر کی حالت ہلکی رہے گی۔