مشرقیہ اور حائل میں 36 ہزار جائیدادوں کی عینی رجسٹریشن کل سے شروع

مشرقیہ اور حائل میں 36 ہزار جائیدادوں کی عینی رجسٹریشن کل اتوار سے شروع ہو رہی ہے، جو دسمبر 2026 کے آخر تک جاری رہے گی۔ اس دوران رجسٹریشن نہ کرانے والے مالکان پر جرمانے عائد کیے جائیں گے۔

سعودی جنرل اتھارٹی برائے املاک نے اعلان کیا ہے کہ مشرقیہ اور حائل میں مجموعی طور پر 36 ہزار 90 جائیدادوں کی عینی رجسٹریشن کا آغاز کیا جا رہا ہے، جن میں 30 ہزار 838 جائیدادیں مشرقیہ اور 5 ہزار 252 جائیدادیں حائل میں شامل ہیں۔ یہ عمل اتوار 27 ستمبر سے شروع ہو کر جمعرات 31 دسمبر 2026 تک جاری رہے گا۔

اس مرحلے میں مشرقیہ کے ضلع ملیجہ کے جن علاقوں کو رجسٹریشن کے لیے منتخب کیا گیا ہے ان میں الخالدیہ، الفلاح، صنعتی علاقہ، النخیل، الشفاء، المستشفى، نايف، الازدهار اور دیگر جائیدادی علاقے شامل ہیں۔ القليب میں النسيم اور دیگر علاقوں میں بھی رجسٹریشن شروع ہو گی۔

قیصومہ میں احواش الأغنام اور دیگر علاقوں میں، حفر الباطن میں ہجرت السلیمانیہ، الصفیری اور دیگر علاقوں میں، جبکہ الذبیبہ میں الیاسمین، الورود، الفلاح، النخیل، جزوی طور پر الندى اور دیگر علاقوں میں رجسٹریشن کا آغاز ہو گا۔

اسی طرح دمام، الظهران، بقیق اور الخفجی سمیت متعدد اضلاع میں بھی جائیدادوں کی رجسٹریشن شروع ہو گی۔ حائل کے بقعاء میں جزوی طور پر النخیل اور الاندلس کے علاقے اور دیگر جائیدادی علاقے شامل ہیں۔ مزید یہ کہ فید اور الاجفر میں بھی رجسٹریشن ہو گی۔ اتھارٹی کے مطابق علاقوں کا انتخاب مخصوص معیارات کے تحت کیا گیا ہے اور آئندہ مرحلوں میں دیگر علاقوں اور اضلاع کے ناموں کا اعلان کیا جائے گا۔

ان علاقوں اور محلوں میں پہلی بار جائیداد کی رجسٹریشن کے لیے الیکٹرانک پلیٹ فارم https://rer.sa یا سروس سینٹرز کے ذریعے درخواست دی جا سکتی ہے۔ رجسٹریشن کے لیے لازمی ہے کہ ملکیت کا سرٹیفکیٹ تمام قانونی تقاضے پورے کرتا ہو۔

اتھارٹی نے متعلقہ علاقوں کے جائیداد مالکان سے اپیل کی ہے کہ وہ اپنے ملکیتی دستاویزات کی جانچ اور مطلوبہ شرائط کی تکمیل کو یقینی بنائیں۔ رجسٹریشن کے طریقہ کار کے بارے میں معلومات اتھارٹی کے سرکاری پلیٹ فارمز یا کسٹمر سروس سینٹر 199002 پر حاصل کی جا سکتی ہیں۔

رجسٹریشن کے آغاز کے بعد ہر رجسٹرڈ جائیداد کو ایک 'رقم عقار' اور ملکیت کا رجسٹریشن سرٹیفکیٹ جاری کیا جائے گا، جس میں جائیداد کی تفصیلات، اوصاف، حالت اور اس سے منسلک حقوق و ذمہ داریاں اور درست جیو اسپیشل معلومات شامل ہوں گی۔ اس اقدام کا مقصد رئیل اسٹیٹ سیکٹر میں شفافیت اور اعتماد کو فروغ دینا اور اس کی پائیداری کو یقینی بنانا ہے۔