موسمی صورتحال: شہریوں کو احتیاط برتنے کی ہدایت

سعودی محکمہ دفاعِ مدنی نے شہریوں سے اپیل کی ہے کہ وہ مکہ مکرمہ، مدینہ منورہ، حائل، جازان، باحہ اور عسیر میں جاری موسمی صورتحال کے باعث احتیاط اور حفاظتی ہدایات پر عمل کریں۔ یہ ہدایت قومی مرکز برائے موسمیات کی جانب سے جاری کردہ ریڈ الرٹ کے بعد دی گئی ہے۔

محکمہ نے اپنے سرکاری ایکس اکاؤنٹ پر بتایا کہ ان علاقوں میں شدید بارشیں متوقع ہیں، اس لیے شہری زیادہ سے زیادہ احتیاط برتیں اور پانی کے جمع ہونے والے مقامات، وادیوں اور ڈیموں کے قریب جانے سے گریز کریں تاکہ عوامی سلامتی کو یقینی بنایا جا سکے۔

دفاعِ مدنی نے بارش کے دوران حفاظتی تدابیر اختیار کرنے اور سیلابی ریلوں کے راستے عبور نہ کرنے کی اہمیت پر بھی زور دیا ہے۔