شرقیہ میں قتل کے تین مجرموں کو سزائے موت دے دی گئی

وزارت داخلہ نے اعلان کیا ہے کہ مشرقی ریجن میں تین سعودی شہریوں کو ایک شہری کے قتل کے جرم میں قصاصاً سزائے موت دی گئی ہے۔

وزارت کے مطابق عبداللہ بن ملحق بن محمد المرزوقی البقمی، عبدالمجید بن شباب بن غازی الکریزی البقمی اور مالک بن عبداللہ بن علی البرغش نے احمد بن علی بن عبداللہ سبعی (سعودی شہری) کو مختلف اوزاروں سے متعدد بار مارا، اس کے ہاتھ پاؤں باندھے اور گردن کو رسی سے جکڑ دیا جس کے نتیجے میں اس کی موت واقع ہوئی۔

بیان میں مزید کہا گیا کہ سکیورٹی اداروں نے ملزمان کو گرفتار کر لیا، تفتیش کے بعد ان پر فرد جرم عائد کی گئی اور انہیں متعلقہ عدالت میں پیش کیا گیا، جہاں ان کے خلاف قصاصاً سزائے موت کا حتمی فیصلہ سنایا گیا، جس کی اعلیٰ حکام نے توثیق کی اور شاہی فرمان کے تحت اس پر عملدرآمد کیا گیا۔

سزائے موت اتوار 21 جمادی الاول 1448 ہجری بمطابق یکم نومبر 2026 کو مشرقی ریجن میں دی گئی۔

وزارت داخلہ نے اس موقع پر کہا کہ مملکت کی حکومت امن و امان کے قیام، عدل کی فراہمی اور شریعت کے احکامات کے نفاذ کے لیے پرعزم ہے اور اس نے شہریوں پر حملے اور خونریزی کے سنگین نتائج سے خبردار کیا۔