ریاض میں ماحولیاتی قوانین کی خلاف ورزی پر 6 غیرملکی گرفتار

ریاض ریجن میں ماحولیاتی قوانین کی خلاف ورزی اور ریت و بجری کے غیرقانونی استحصال پر سکیورٹی فورسز نے شام، مصر اور یمن سے تعلق رکھنے والے 6 غیرملکی باشندوں کو گرفتار کر لیا ہے۔ ان کے خلاف قانونی کارروائی عمل میں لائی گئی ہے۔

سکیورٹی فورسز کے مطابق کارروائی کے دوران 10 مشینیں بھی ضبط کی گئی ہیں جو مٹی ہٹانے اور منتقل کرنے کے لیے استعمال ہو رہی تھیں۔ فورسز نے شہریوں پر زور دیا ہے کہ وہ ماحول یا جنگلی حیات کے خلاف کسی بھی خلاف ورزی کی اطلاع مکہ مکرمہ، مدینہ منورہ، ریاض اور مشرقی ریجن میں 911 اور دیگر علاقوں میں 999 یا 996 پر دیں۔ فورسز نے یقین دہانی کرائی ہے کہ تمام اطلاعات کو مکمل رازداری کے ساتھ نمٹایا جائے گا اور اطلاع دینے والے پر کوئی ذمہ داری عائد نہیں ہوگی۔