شام کی جانب سے حوثی حملے کی شدید مذمت

شام نے حوثی ملیشیا کی جانب سے ڈرون کے ذریعے مکہ مکرمہ کو نشانہ بنانے کی کوشش کی شدید الفاظ میں مذمت کی ہے۔ شام نے کہا کہ مکہ مکرمہ، جو مسلمانوں کا قبلہ ہے، اس کے امن کو نقصان پہنچانا، اس کے اطراف کو نشانہ بنانا یا ضیوف الرحمن، شہریوں اور مقیم افراد کی سلامتی کو خطرے میں ڈالنا مقدس مقامات کی حرمت کی سنگین خلاف ورزی اور تمام مسلمانوں کے جذبات کو بھڑکانے کے مترادف ہے۔

شامی وزارت خارجہ نے آج جاری بیان میں سعودی عرب کے ساتھ مکمل یکجہتی کا اظہار کرتے ہوئے کہا کہ شام حوثی ملیشیا کی دھمکیوں کے مقابلے میں سعودی عرب کے شانہ بشانہ کھڑا ہے۔

بیان میں مزید کہا گیا کہ شام ان تمام فیصلوں کی حمایت کرتا ہے جو سعودی عرب حرمین شریفین کے تحفظ کے لیے کرے گا۔ ساتھ ہی مقدس مقامات کی حرمت کے احترام اور انہیں علاقائی تنازعات کے اثرات سے دور رکھنے کی ضرورت پر زور دیا گیا، تاکہ ان کی تقدس برقرار رہے۔