اقوام متحدہ کی حوثی حملوں کی مذمت، کشیدگی کم کرنے کی اپیل

اقوام متحدہ نے سعودی عرب کے خلاف حوثی ملیشیا کے سرحد پار حملوں کی مذمت کی ہے، جن میں ریاض کو نشانہ بنانے کی کوشش، عام شہریوں اور توانائی کے بنیادی ڈھانچے پر حملے شامل ہیں۔ اقوام متحدہ نے تمام فریقوں پر زور دیا ہے کہ وہ تحمل کا مظاہرہ کریں اور مزید کشیدگی سے گریز کریں۔

اقوام متحدہ کے سیکریٹری جنرل کے ترجمان اسٹیفن دوجارک نے آج ایک پریس بریفنگ میں یمن اور اس کے آس پاس فوجی کشیدگی میں اضافے پر شدید تشویش کا اظہار کیا۔ انہوں نے کہا کہ اس میں تعز، لحج اور مارب میں حوثیوں کے حملے اور ان کے یمن و خطے کے شہریوں پر سنگین اثرات شامل ہیں۔

انہوں نے اس بات پر زور دیا کہ بین الاقوامی انسانی قانون کی پاسداری ضروری ہے، جس میں عام شہریوں اور شہری انفرا اسٹرکچر پر براہ راست حملوں کی ممانعت بھی شامل ہے۔