سعودی عرب کے بیشتر علاقوں میں گرج چمک کے ساتھ بارشیں، شہریوں کو خبردار

محکمہ دفاعِ مدنی نے شہریوں کو خبردار کیا ہے کہ جمعہ سے آئندہ منگل تک مملکت کے بیشتر علاقوں میں گرج چمک کے ساتھ بارشیں متوقع ہیں، اس لیے احتیاط اور ہوشیاری اختیار کریں۔

دفاعِ مدنی نے زور دیا ہے کہ شہری محفوظ مقامات پر رہیں، سیلابی ریلوں اور وادیوں سے دور رہیں اور ان میں تیراکی سے گریز کریں، نیز میڈیا اور سوشل میڈیا پر جاری ہدایات پر عمل کریں۔

قومی مرکز برائے موسمیات کے مطابق، مکہ مکرمہ ریجن میں درمیانے سے شدید بارشیں متوقع ہیں جو سیلابی ریلوں اور ژالہ باری کا سبب بن سکتی ہیں، جبکہ تیز ہوائیں گرد و غبار کا باعث بنیں گی۔ یہ صورتحال طائف، میسان، اضم، العرضیات، مکہ مکرمہ، کامل، الجموم، بحرة، خلیص، جدہ، رابغ، تربہ، الخرمة، رنیہ، المویہ، القنفذہ اور اللیث سمیت متعدد علاقوں میں پیش آسکتی ہے۔

مرکز نے مزید بتایا کہ ریاض ریجن میں بھی درمیانے سے شدید بارشیں متوقع ہیں جن سے سیلابی ریلوں، ژالہ باری اور تیز ہواؤں کا خدشہ ہے۔ اس میں عفیف، الدوادمی، شقراء، ثادق، الغاط، الزلفی، المجمعة، رماح اور مرات شامل ہیں، جبکہ دارالحکومت ریاض، القویعیہ، الرین، ضرما، الحريق اور الخرج میں ہلکی سے درمیانے درجے کی بارشیں ہوں گی۔

قومی مرکز برائے موسمیات کے مطابق جازان، عسیر، الباحہ، مدینہ منورہ، حائل، قصیم، الجوف، شمالی حدود اور مشرقی ریجن میں بھی درمیانے سے شدید بارشیں متوقع ہیں، جو سیلابی ریلوں، ژالہ باری اور تیز ہواؤں کے ساتھ گرد و غبار کا باعث بن سکتی ہیں۔