سعودی عرب میں آج بارش، ژالہ باری اور تیز ہوائیں متوقع

محکمہ موسمیات نے منگل کے روز اپنی رپورٹ میں کہا ہے کہ جازان، عسیر، الباحہ، مکہ مکرمہ اور مدینہ منورہ کے کچھ علاقوں میں گرج چمک کے ساتھ بارش، ژالہ باری اور گرد آلود تیز ہوائیں چلنے کا امکان ہے۔

محکمہ کے مطابق مشرقی ریجن میں درجہ حرارت زیادہ رہے گا اور وہاں بھی سطحی ہوائیں تیز چل سکتی ہیں، جبکہ اس کے جنوبی حصوں اور نجران کے بعض علاقوں میں بھی گرج چمک کے ساتھ بارش کا امکان ہے۔

محکمہ موسمیات کی رپورٹ کے مطابق بحیرہ احمر میں شمالی اور وسطی حصے میں ہوائیں شمال مغربی سے مغربی سمت میں 15 سے 45 کلومیٹر فی گھنٹہ کی رفتار سے چلیں گی، جبکہ جنوبی حصے میں 10 سے 35 کلومیٹر فی گھنٹہ کی رفتار سے ہوائیں چلیں گی۔ جنوبی حصے میں گرج چمک کے ساتھ بارش کے دوران ہواؤں کی رفتار 50 کلومیٹر فی گھنٹہ سے تجاوز کر سکتی ہے۔ سمندر میں لہریں آدھے میٹر سے ڈیڑھ میٹر تک بلند ہوں گی، جبکہ وسطی حصے میں دو میٹر اور جنوبی حصے میں گرج چمک کے ساتھ بارش کے دوران دو میٹر سے بھی زیادہ ہو سکتی ہیں۔ اس دوران سمندر کی کیفیت ہلکی سے درمیانی، اور جنوبی حصے میں گرج چمک کے ساتھ بارش کے دوران تیز لہروں والی ہو سکتی ہے۔

خلیج عرب میں ہوائیں شمال مغربی سے مغربی سمت میں چلیں گی، جو شام کے وقت شمالی اور وسطی حصے میں جنوب مشرقی سے جنوب مغربی سمت میں بدل جائیں گی۔ جنوبی حصے میں دوپہر کے بعد جنوب مشرقی سے شمال مشرقی اور پھر شمال مشرقی سے شمال مغربی سمت میں بدل جائیں گی۔ ہواؤں کی رفتار 10 سے 28 کلومیٹر فی گھنٹہ رہے گی، جبکہ لہریں آدھے میٹر سے ایک میٹر تک بلند ہوں گی اور سمندر کی کیفیت ہلکی رہے گی۔