مکہ میں درخت کاٹ کر کوئلہ بنانے والے دو سوڈانی باشندے گرفتار

خصوصی فورس برائے ماحولیاتی تحفظ نے مکہ مکرمہ میں ماحولیاتی قوانین کی خلاف ورزی کرنے والے دو سوڈانی باشندوں کو گرفتار کیا ہے۔ ان پر مقامی درخت کاٹنے اور انہیں جلا کر کوئلہ بنانے کا الزام ہے۔ ان کے قبضے سے 40 مکعب میٹر مقامی لکڑی اور 15 مکعب میٹر مقامی کوئلہ برآمد ہوا۔ ان کے خلاف قانونی کارروائی کی گئی اور ضبط شدہ مال متعلقہ ادارے کے حوالے کر دیا گیا۔

فورس کے مطابق، بغیر اجازت درخت کاٹنے، اکھاڑنے، منتقل کرنے، مٹی ہٹانے یا ان کی خرید و فروخت پر فی درخت 20,000 سعودی ریال تک جرمانہ ہو سکتا ہے۔ اسی طرح مقامی لکڑی اور کوئلہ نقل، فروخت یا ذخیرہ کرنے پر فی مکعب میٹر 16,000 سعودی ریال تک جرمانہ عائد ہو سکتا ہے۔ جنگلات یا قومی پارکوں میں مخصوص مقامات کے علاوہ آگ جلانے پر 3,000 سعودی ریال تک جرمانہ ہے۔ فورس نے شہریوں سے اپیل کی ہے کہ وہ ماحول یا جنگلی حیات پر کسی بھی قسم کے حملے کی اطلاع مکہ، مدینہ، ریاض اور مشرقی ریجن میں 911 اور دیگر علاقوں میں 999 یا 996 پر دیں۔ تمام شکایات کو مکمل رازداری کے ساتھ نمٹایا جائے گا اور اطلاع دینے والے پر کوئی ذمہ داری عائد نہیں ہوگی۔