سعودی عرب میں آج بارش اور تیز ہوائیں متوقع

محکمہ موسمیات نے آج کے موسم کی رپورٹ میں بتایا ہے کہ جازان، عسیر، الباحہ، مکہ مکرمہ اور مدینہ منورہ کے بعض حصوں میں درمیانے سے شدید درجے کی گرج چمک کے ساتھ بارش جاری رہنے کا امکان ہے، جس سے سیلابی ریلے بھی آسکتے ہیں اور بعض مقامات پر ژالہ باری بھی متوقع ہے۔ اسی طرح تبوک، الجوف اور شمالی حدود کے کچھ علاقوں میں بھی گرج چمک والے بادل بننے کا امکان ہے، جبکہ ان علاقوں میں گرد و غبار اٹھانے والی تیز ہوائیں بھی اثر انداز ہوں گی۔ علاوہ ازیں، مکہ مکرمہ کے ساحلی حصوں اور مشرقی ریجن کے ساحلی علاقوں میں دھند چھانے کا بھی امکان ہے۔

رپورٹ کے مطابق بحیرہ احمر میں سطحی ہوائیں شمال مغرب سے شمال کی سمت 15 تا 40 کلومیٹر فی گھنٹہ کی رفتار سے چلیں گی، جو خلیج عقبہ کی طرف 45 کلومیٹر فی گھنٹہ تک پہنچ سکتی ہیں۔ جبکہ شمال مغرب سے شمال مشرق کی سمت ہوائیں 10 تا 32 کلومیٹر فی گھنٹہ کی رفتار سے چلیں گی اور گرج چمک والے بادل بننے پر یہ رفتار 50 کلومیٹر فی گھنٹہ سے بھی تجاوز کر سکتی ہے۔ سمندر میں لہریں نصف میٹر سے ڈیڑھ میٹر تک بلند ہوں گی اور گرج چمک والے بادل بننے پر دو میٹر سے بھی زیادہ ہو سکتی ہیں۔ اس دوران سمندر کی حالت ہلکی سے درمیانی اور گرج چمک والے بادل بننے پر شدید ہو سکتی ہے۔

خلیج عرب میں سطحی ہوائیں شمال مغرب سے جنوب مغرب کی سمت 8 تا 25 کلومیٹر فی گھنٹہ اور جنوب مغرب سے شمال مغرب کی سمت 8 تا 25 کلومیٹر فی گھنٹہ کی رفتار سے چلیں گی۔ اس دوران لہریں نصف میٹر سے ایک میٹر تک بلند ہوں گی اور سمندر کی حالت ہلکی رہے گی۔