بریدہ تمر کارنیول میں نایاب اقسام کی نمائش، قصیم کا زرعی ورثہ اجاگر

قصیم ریجن میں جاری بریدہ تمر کارنیول میں 100 سے زائد اقسام کی کھجوریں نمائش کے لیے پیش کی گئی ہیں، جن میں بعض نایاب اقسام بھی شامل ہیں جو اپنی منفرد شکل، ذائقے اور رنگ کے باعث کاشتکاروں اور شائقین کی خصوصی توجہ کا مرکز بنی ہوئی ہیں۔ یہ کارنیول ان اقسام کو متعارف کرانے کا اہم پلیٹ فارم ہے، جو علاقے کے روایتی زرعی ورثے کی نمائندگی کرتی ہیں، جیسے نبتہ سیف، نبتہ علی، حلوہ، ونانہ، مکتومی، خضری، روثانہ اور صفاوی۔

یہ نایاب اقسام اپنی منفرد خصوصیات اور محدود پیداوار کے باعث کارنیول کے شرکاء کی خصوصی توجہ حاصل کر رہی ہیں۔ بعض اقسام ایسی ہیں جو بڑے پیمانے پر کاشت نہیں ہوتیں، جبکہ دیگر مقامی کھجوریں ہیں جو قصیم کی زرعی تاریخ سے کئی دہائیوں سے جڑی ہوئی ہیں۔

کارنیول کے منتظمین کے مطابق یہ ایونٹ ان اقسام کی زرعی اور ثقافتی اہمیت کو اجاگر کرنے کے ساتھ ساتھ کاشتکاروں اور شائقین کو کھجور کی کاشت، دیکھ بھال، تحفظ اور مارکیٹنگ کے حوالے سے تجربات کے تبادلے کا موقع فراہم کرتا ہے۔

تنوع اور زرعی ورثے کا تحفظ

کارنیول میں نایاب کھجوروں کی موجودگی سے کھجور کے جینیاتی تنوع کے تحفظ کی اہمیت اجاگر ہوتی ہے، جو قصیم کی زرعی دولت اور بڑھتے ہوئے کھجور کے شعبے میں پیداوار، مارکیٹنگ اور صنعت کے لیے اہم کردار ادا کرتا ہے۔

یہ اقسام کاشتکاروں کے لیے اپنی پیداوار میں تنوع اور ان اقسام کو دوبارہ زندہ کرنے کا موقع فراہم کرتی ہیں، جن کی کاشت گزشتہ برسوں میں کم ہو گئی تھی، اس طرح زرعی ورثے کے تحفظ اور اس کی آئندہ نسلوں تک منتقلی کو یقینی بنایا جا رہا ہے۔

عالمی ایونٹ، وژن 2030 کی حمایت

واضح رہے کہ بریدہ بین الاقوامی تمر کارنیول ہر سال یکم اگست سے وسط اکتوبر تک 75 دن جاری رہتا ہے، جسے نیشنل سینٹر فار پام اینڈ ڈیٹس کے زیر اہتمام منعقد کیا جاتا ہے۔ یہ ایونٹ سعودی وژن 2030 کے تحت زرعی شعبے کی ترقی اور غذائی تحفظ کے اہداف سے ہم آہنگ ہے اور اب عالمی سطح پر ایک اہم زرعی و معاشی ایونٹ بن چکا ہے۔