مأرب حوثیوں کے لیے ناقابل تسخیر رہے گی: یمنی فوجی کمانڈر

یمنی فوج کے تیسرے عسکری زون کے کمانڈر، میجر جنرل منصور ثوابة نے کہا ہے کہ صوبہ مأرب ماضی میں بھی حوثی ملیشیا کے لیے ناقابل تسخیر رہا ہے اور آئندہ بھی رہے گا، اس کی وجہ یہاں کے عوام، قبائل، مسلح افواج، سیکیورٹی فورسز اور عوامی مزاحمت کی یکجہتی ہے۔

سرکاری یمنی خبررساں ایجنسی کے مطابق، جنرل ثوابة نے کہا کہ آج کی مأرب، ماضی کی مأرب نہیں ہے؛ پہلے یہ دفاع کرتی تھی، اب حملہ آور ہے اور اس کی نظریں صنعاء پر ہیں۔ انہوں نے اس عزم کا اعادہ کیا کہ مسلح افواج اپنی جدوجہد جاری رکھیں گی تاوقتیکہ حوثی ملیشیا کے زیر قبضہ تمام علاقے آزاد اور ریاستی ادارے بحال نہ ہو جائیں۔

یمنی تیسرے عسکری زون کے کمانڈر نے چند روز قبل جنوبی مأرب میں مسلح افواج کی پوزیشنز پر حوثی ملیشیا کے حملوں کا ذکر کرتے ہوئے کہا کہ مسلح افواج کے جوانوں نے ان حملوں کو ناکام بنایا اور حوثیوں کو جانی و مالی نقصان پہنچایا۔

انہوں نے بتایا کہ بڑی تعداد میں حوثی عناصر کی لاشیں اب بھی وادیوں اور محاذوں پر بکھری ہوئی ہیں، اور حوثی ملیشیا نے اپنے کئی افراد کو میدان میں چھوڑ دیا، نہ ان کی مدد کی اور نہ ہی انہیں نکالا۔ انہوں نے حوثی گروہ کو 'ایسی دہشت گرد تنظیم' قرار دیا جس کا نہ جنگ میں کوئی دین ہے اور نہ امن میں کوئی اخلاق۔

یمنی فوجی کمانڈر نے مسلح افواج کی فتوحات، صلاحیت اور جنگی مہارت کا ذکر کرتے ہوئے کہا کہ مأرب سمیت تمام محاذوں پر افواج مشترکہ آپریشن روم کے تحت، متحدہ قیادت اور اعلیٰ قیادت کی ہدایات کے مطابق کام کر رہی ہیں۔

یمن میں تیسرے عسکری زون کے کمانڈر نے بری اور فضائی افواج کے درمیان آپریشنز کے دوران بہترین ہم آہنگی کو سراہا اور سعودی عرب کی قیادت میں عرب اتحاد کی جانب سے مسلح افواج کی حمایت اور مدد کو قابل قدر قرار دیا۔ انہوں نے مختلف محاذوں پر مشترکہ کارروائی اور تعاون کے تسلسل پر بھی زور دیا۔

جنرل ثوابة نے حوثی ملیشیا کے زیر قبضہ علاقوں کے قبائل سے اپیل کی کہ وہ اپنے بچوں کو حوثی ملیشیا کی صفوں میں نہ بھیجیں، اور خبردار کیا کہ انہیں جنگ میں جھونکنا 'انہیں موت کے منہ میں بھیجنے کے مترادف ہے اور وہ لاشوں کی صورت میں واپس آئیں گے'۔