ولی عہد محمد بن سلمان سے بحرینی بادشاہ کے نمائندے کی ملاقات

ریاض میں آج سعودی ولی عہد و وزیراعظم شہزادہ محمد بن سلمان نے بحرین کے بادشاہ کے نمائندہ برائے انسانی امور و امور نوجوانان اور قومی سلامتی کے مشیر، شیخ ناصر بن حمد آل خلیفہ کا استقبال کیا۔

استقبال کے دوران شیخ ناصر بن حمد نے بحرین کے بادشاہ حمد بن عیسیٰ آل خلیفہ کی جانب سے خادم الحرمین الشریفین شاہ سلمان بن عبدالعزیز اور ولی عہد کو نیک تمنائیں پہنچائیں، جبکہ ولی عہد نے بھی شیخ ناصر بن حمد کے ذریعے شاہ سلمان اور اپنی جانب سے بحرینی بادشاہ کے لیے خیرسگالی پیغام بھیجا۔

ملاقات میں دونوں برادر ممالک کے تاریخی تعلقات اور باہمی دلچسپی کے امور پر تبادلہ خیال کیا گیا۔

اس موقع پر وزیر مملکت و رکن کابینہ شہزادہ ترکی بن محمد بن فہد بن عبدالعزیز بھی موجود تھے۔