حوثی حملہ: مکہ پر حملہ عالمی سطح پر سخت ردعمل کا متقاضی

خلیجی تعاون کونسل کے سیکریٹری جنرل جاسم محمد البدیوی نے مکہ مکرمہ کو نشانہ بنانے کی حوثی ملیشیا کی بزدلانہ دہشت گردانہ کوشش کی شدید ترین الفاظ میں مذمت کی ہے۔

انہوں نے کہا کہ یہ مجرمانہ اور مذموم حوثی اقدام نہایت خطرناک اشتعال انگیزی ہے، جو تمام حدود و قیود کی خلاف ورزی اور مسلمانوں کے قبلہ و مقدس ترین مقام کی حرمت کی کھلی پامالی ہے۔ مکہ مکرمہ پر اس طرح کے دہشت گردانہ حملے ایک بار پھر اس انتہاپسندانہ سوچ کو ظاہر کرتے ہیں جو نہ مقدسات کی حرمت کا لحاظ کرتی ہے اور نہ ہی شہریوں کے تحفظ کا۔ اس صورتحال میں عالمی برادری کو چاہیے کہ وہ سخت اور مؤثر موقف اختیار کرے، ان خلاف ورزیوں کو روکے اور ذمہ داران کو جوابدہ بنائے۔

سیکریٹری جنرل نے واضح کیا کہ مکہ مکرمہ کی حرمت اور اس کے امن کو نقصان پہنچانا صرف سعودی عرب پر حملہ نہیں بلکہ دنیا بھر کے مسلمانوں کے جذبات کو شدید اشتعال دلانے کے مترادف ہے۔ انہوں نے کہا کہ مقدسات کو نشانہ بنانا ایسا خطرناک اقدام ہے جسے کسی صورت برداشت نہیں کیا جا سکتا۔

انہوں نے مزید کہا کہ خلیجی تعاون کونسل کی تمام رکن ریاستیں سعودی عرب کے ساتھ مکمل یکجہتی میں کھڑی ہیں اور مملکت کا اور اس کے مقدسات کا تحفظ، کونسل کے تمام ممالک کی مشترکہ ذمہ داری ہے۔ انہوں نے سعودی عرب کی خودمختاری، سرزمین، مقدسات، شہریوں اور مقیم افراد کے تحفظ کے لیے کیے گئے تمام اقدامات اور تدابیر کی مکمل حمایت کا اعادہ کیا اور کہا کہ جو بھی مملکت کے امن و استحکام کو نقصان پہنچانے کی کوشش کرے گا، اس کے خلاف سخت کارروائی کی جائے گی۔