دیوان مظالم میں مصنوعی ذہانت کے ذمہ دارانہ استعمال کا فریم ورک منظور

دیوان مظالم کے سربراہ اور مجلس القضاء الاداری کے صدر ڈاکٹر علی بن احمد الاحیدب نے منگل 15 ستمبر 2026 کو دیوان میں مصنوعی ذہانت کے نظام کے استعمال کے لیے گورننس فریم ورک کی منظوری دے دی۔ یہ اقدام ریاض میں منعقدہ یونیسکو کے چوتھے عالمی فورم برائے اخلاقیاتِ مصنوعی ذہانت کی افتتاحی تقریب کے موقع پر سامنے آیا۔

ڈاکٹر الاحیدب نے واضح کیا کہ مملکت میں مصنوعی ذہانت کی اخلاقیات اب قومی گورننس نظام کا بنیادی حصہ بن چکی ہیں اور دیوان مظالم اپنی عدالتی و انتظامی سطح پر عملے کو اس سے استفادے کے قابل بنانے کے لیے کوشاں ہے، جو سال 2026 کو مصنوعی ذہانت کا سال قرار دیے جانے کی کوششوں کا حصہ ہے۔

نیا فریم ورک عدالتی و انتظامی امور اور دیوان کی ڈیجیٹل پلیٹ فارمز میں مصنوعی ذہانت کے نظام کے استعمال کو منظم کرنے، ذمہ دارانہ اور محفوظ استعمال کو یقینی بنانے، ڈیٹا کے تحفظ اور متعلقہ قومی قوانین و پالیسیوں کی پاسداری کو فروغ دینے کے لیے تیار کیا گیا ہے۔

پہلے اصولی دستاویز اور باقاعدہ جائزہ فریم ورک

یاد رہے کہ دیوان مظالم نے رواں سال مارچ میں مصنوعی ذہانت کے نظام کے استعمال سے متعلق اصولی دستاویز جاری کی تھی، جس کا مقصد ادارے کے شعبہ جات میں ان نظاموں کی تیاری و استعمال کو منظم کرنا اور اس سے متعلقہ ضوابط و اخلاقیات وضع کرنا تھا۔

نیا گورننس فریم ورک متعلقہ اداروں کی جانب سے جاری کردہ پالیسیوں اور ضوابط کے ساتھ ساتھ دیوان میں منظور شدہ داخلی پالیسیوں پر بھی مبنی ہے۔ اس فریم ورک میں ڈیجیٹل عدالتی خدمات مرکز کے مصنوعی ذہانت و ابھرتی ٹیکنالوجیز دفتر کی جانب سے باقاعدہ جائزے اور اپ ڈیٹ کا نظام بھی شامل ہے، تاکہ تیزی سے بدلتی ٹیکنالوجی کے تقاضوں سے ہم آہنگ رہا جا سکے اور ذمہ دارانہ استعمال کے اصولوں سے متعلق آگاہی کو فروغ دیا جا سکے۔