تعاون اسلامی: اسرائیل کے بائیکاٹ کا حق بین الاقوامی قانون کے مطابق ہے

منظمہ تعاون اسلامی کے فلسطین و القدس امور کے معاون سیکریٹری جنرل، سفیر دواس دواس نے کہا ہے کہ اسرائیل کا معاشی بائیکاٹ ایک جائز دفاعی اقدام ہے جو بین الاقوامی قانون کی بنیاد پر کیا جا رہا ہے۔ انہوں نے اس بات پر زور دیا کہ اسرائیل اور ان غیر ملکی اداروں کا بائیکاٹ جاری رکھا جائے جو غیر قانونی بستیوں سے لین دین کرتے ہیں، تا وقتیکہ قبضہ ختم ہو اور فلسطینی عوام کو ان کے جائز حقوق مل جائیں۔

یہ بات انہوں نے قاہرہ میں عرب لیگ کے ہیڈکوارٹر میں منعقدہ اسرائیل کے بائیکاٹ سے متعلق علاقائی دفاتر کے 98ویں رابطہ افسران کے اجلاس سے خطاب میں کہی۔

سفیر دواس نے واضح کیا کہ موجودہ حالات میں محض مذمت کافی نہیں، بلکہ عملی اقدامات کی ضرورت ہے۔ اس کے لیے بائیکاٹ کے فیصلوں پر عمل درآمد اور علاقائی دفاتر کے کام کو مزید مؤثر بنانا ہوگا، ساتھ ہی ان کمپنیوں اور اداروں کے بارے میں معلومات کا تبادلہ بڑھانا ہوگا جو آبادکاری کی حمایت کرتے ہیں۔ انہوں نے کہا کہ رکن ممالک کے درمیان تعاون سے آبادکاری کے منصوبے کو ان معاشی وسائل سے محروم کیا جا سکتا ہے جو اس کے پھیلاؤ اور تسلسل میں مددگار ہیں۔

فلسطینی علاقوں میں کشیدگی

انہوں نے کہا کہ فلسطینی مسئلہ اس وقت غیر معمولی کشیدگی کے دور سے گزر رہا ہے، خاص طور پر غزہ پر جاری جنگ، مغربی کنارے اور القدس میں انسانی حقوق کی سنگین خلاف ورزیاں، جن میں قتل، گرفتاری، جبری نقل مکانی، گھروں کی مسماری، اراضی کی ضبطی اور بستیوں کی توسیع شامل ہیں۔ اس کے علاوہ، آبادکاروں کی جانب سے فلسطینی شہریوں اور عبادت گاہوں پر حملے بھی جاری ہیں، جنہیں قابض افواج کی سرپرستی حاصل ہے۔

انہوں نے نشاندہی کی کہ یہ سب اقدامات ایک سرکاری پالیسی کا حصہ ہیں جس کا مقصد آبادیاتی اور جغرافیائی حقائق کو بدلنا اور فلسطینی ریاست کے قیام کے امکانات کو کمزور کرنا ہے۔

عالمی سطح پر شعور میں اضافہ

معاون سیکریٹری جنرل نے کہا کہ عالمی برادری میں غیر قانونی بستیوں کے ساتھ معاشی تعلقات کے خطرات کے حوالے سے شعور بڑھ رہا ہے۔ انہوں نے بتایا کہ یورپی ممالک اور ادارے، جن میں بیلجیم اور نیدرلینڈز شامل ہیں، بستیوں کی مصنوعات کے بائیکاٹ اور مالیاتی اداروں و بین الاقوامی کمپنیوں کی سرمایہ کاری پر نظرثانی کے لیے اقدامات کر رہے ہیں۔

سفیر دواس نے عرب لیگ کے اسرائیل بائیکاٹ دفتر کی کوششوں کو سراہتے ہوئے کہا کہ تنظیم اور عرب لیگ کے درمیان تعاون کو مزید مضبوط بنانا ضروری ہے، تاکہ بائیکاٹ کے فیصلوں پر عمل درآمد ہو سکے۔ اس سے اسرائیل کو بین الاقوامی قوانین کا احترام کرنے، فلسطینی اور عرب علاقوں سے قبضہ ختم کرنے اور 1967ء کی سرحدوں کے مطابق آزاد فلسطینی ریاست کے قیام پر مجبور کیا جا سکے، جس کا دارالحکومت القدس ہو۔