مصر کی سعودی عرب سے مکمل یکجہتی، بحیرہ احمر میں سعودی جہاز پر حملے کی مذمت

جمہوریہ مصر نے سعودی عرب کے ساتھ اپنے مستقل اور مکمل یکجہتی کے مؤقف کو دہرایا ہے اور بحیرہ احمر میں سعودی جہاز پر ہونے والے دہشت گرد حملے کی شدید مذمت کی ہے۔ مصر نے واضح کیا ہے کہ وہ اس واقعے سمیت تمام ایسے حملوں کو مکمل طور پر مسترد کرتا ہے جو تنصیبات، اہم مقامات یا شہری نقل و حمل کے ذرائع کو نشانہ بناتے ہیں یا بحیرہ احمر اور بین الاقوامی آبی گذرگاہوں میں جہاز رانی کی سلامتی اور آزادی کو نقصان پہنچانے کی کوشش کرتے ہیں۔

مصری وزارت خارجہ نے اپنے سرکاری بیان میں کہا کہ بحری جہاز رانی کی آزادی کا تحفظ اور خطے میں آبی گذرگاہوں اور راستوں سے بحفاظت جہازوں کی آمد و رفت کو یقینی بنانا انتہائی اہم ہے اور اس پر کوئی سمجھوتہ نہیں کیا جا سکتا، کیونکہ یہ براہ راست عالمی تجارت کے استحکام اور بین الاقوامی سپلائی چین کے تسلسل سے جڑا ہوا ہے۔

بیان کے اختتام پر قاہرہ نے اس بات پر زور دیا کہ بین الاقوامی قانون اور اقوام متحدہ کے منشور میں طے شدہ قواعد و ضوابط کی پابندی ضروری ہے، اور بین الاقوامی آبی گذرگاہوں کے تحفظ اور خطے کو کشیدگی اور بحری راستوں میں خلل کے خطرات سے بچانے کے لیے کوششیں تیز کرنے کی اپیل کی۔