دیر الزور ایئرپورٹ 14 سال بعد دوبارہ کھول دیا گیا

شامی سول ایوی ایشن اور فضائی نقل و حمل کی جنرل اتھارٹی نے بدھ کو اعلان کیا ہے کہ دیر الزور بین الاقوامی ایئرپورٹ کو مکمل مرمت اور بحالی کے بعد دوبارہ کھول دیا گیا ہے اور اب اندرون ملک اور بین الاقوامی پروازیں بحال کر دی گئی ہیں۔ یہ ایئرپورٹ تقریباً 14 سال تک بند رہا۔

اتھارٹی کے مطابق ایئرپورٹ نے پہلی اندرون ملک پرواز کو دمشق بین الاقوامی ایئرپورٹ سے وصول کیا، جس کے ساتھ ہی دونوں شہروں کے درمیان باقاعدہ پروازوں کا آغاز ہو گیا ہے۔ اس کے علاوہ پہلی بین الاقوامی پرواز کویت سے شامی ایئرلائن کے ذریعے ایئرپورٹ پر اتری، جس سے بین الاقوامی پروازیں بھی بحال ہو گئی ہیں۔

اتھارٹی نے مزید بتایا کہ ان دونوں روٹس کی بحالی کا مقصد فضائی سفر کے نیٹ ورک کو وسعت دینا، اندرون ملک پروازوں کو فعال کرنا، مسافروں کی آمد و رفت کو آسان بنانا، اقتصادی و سرمایہ کاری سرگرمیوں کو فروغ دینا اور شام کے مختلف صوبوں اور دیگر ممالک کے درمیان روابط کو مضبوط بنانا ہے۔