کویت کی سفیر نے ایران کے خلاف کارروائیوں میں شمولیت کی خبروں کی تردید کردی

امریکا میں کویت کی سفیر شیخہ الزین الصباح نے وول اسٹریٹ جرنل کی اس رپورٹ کی سختی سے تردید کی ہے جس میں کویت کی ایران کے خلاف فوجی کارروائیوں میں شرکت کا ذکر کیا گیا تھا۔ انہوں نے کہا کہ یہ تمام دعوے مکمل طور پر بے بنیاد ہیں۔

سفیر نے اخبار کے ادارتی بورڈ کو اپنے سرکاری پیغام میں واضح کیا کہ 24 جولائی کو شائع ہونے والی رپورٹ حقیقت سے کوئی تعلق نہیں رکھتی اور اس میں غلط معلومات شامل ہیں۔

انہوں نے زور دے کر کہا کہ کویت نے ایران کے خلاف کسی بھی فوجی کارروائی میں حصہ نہیں لیا، نہ ہی اپنی سرزمین، فضائی حدود یا علاقائی پانی کسی بھی ہمسایہ ملک کے خلاف حملے کے لیے استعمال کرنے کی اجازت دی ہے۔

سفیر نے کہا کہ علاقائی بحران کے دوران کویت کا مؤقف ہمیشہ واضح اور مستقل رہا ہے، جو بین الاقوامی قانون کے احترام، ریاستوں کی خودمختاری کے تحفظ، حسن ہمسائیگی کے فروغ اور مذاکرات و سفارتکاری کے ذریعے تنازعات کے حل پر مبنی ہے۔

انہوں نے مزید کہا کہ کویت نے اپنے جغرافیائی محل وقوع کے باعث کئی دہائیوں سے علاقائی تنازعات کے انسانی اور معاشی اثرات برداشت کیے ہیں اور کویت اس بات پر یقین رکھتا ہے کہ علاقائی سلامتی کشیدگی میں کمی، تحمل اور سنجیدہ و پائیدار سفارتی مکالمے سے ہی ممکن ہے۔

سفیر نے وول اسٹریٹ جرنل سے مطالبہ کیا کہ وہ اپنی رپورٹ میں کویت کے مؤقف کی درست عکاسی کرے۔ انہوں نے اس بات پر زور دیا کہ حقائق کی درستگی پیشہ ورانہ ذمہ داری ہے اور علاقائی استحکام کے تحفظ اور عالمی امن و سلامتی کے معاملات میں عوام کو گمراہ ہونے سے بچانے کے لیے ضروری ہے۔