شام اسرائیل سے تصادم سے گریزاں، سکیورٹی معاہدے کی کوشش

صدر شام احمد الشرع نے کہا ہے کہ ان کا ملک اسرائیل کے ساتھ سکیورٹی معاہدے تک پہنچنے کے لیے متعدد ممالک کی شراکت سے کوشش کر رہا ہے۔

احمد الشرع نے صحافیوں سے گفتگو میں کہا کہ ہم اسرائیل سے تصادم سے گریز کرتے ہیں اور اس میں ہماری کوئی دلچسپی نہیں۔ اگر سکیورٹی معاہدہ کامیاب ہو جاتا ہے تو یہ ایک جامع امن کی راہ ہموار کرے گا، تاہم شام اپنے مقبوضہ جولان پر حق سے دستبردار نہیں ہوگا۔

شامی خبر رساں ایجنسی کے مطابق، اسرائیلی افواج نے شمالی قنیطرہ کے نواح میں واقع طرنجة گاؤں کے اطراف میں توپ خانے سے گولہ باری کی، جس میں چار گولے زرعی اراضی پر گرے تاہم کوئی جانی یا مالی نقصان نہیں ہوا۔

اسرائیلی افواج نے درعا کے مغربی علاقے حوض یرموک میں معریہ اور العارضہ دیہات میں بھی تین فوجی گاڑیوں اور ایک بلڈوزر کے ساتھ پیش قدمی کی اور العارضہ گاؤں کے اندر ایک فوجی چوکی قائم کی۔ اس کے علاوہ علاقے کے دیہات میں پمفلٹس بھی گرائے گئے جن میں رہائشیوں کو سڑکیں بند کرنے یا فوجی گاڑیوں کی نقل و حرکت میں رکاوٹ ڈالنے سے باز رہنے کی ہدایت کی گئی۔