اسرائیلی حملے جنوبی لبنان میں فوج کی تعیناتی میں رکاوٹ

لبنانی فوج نے کہا ہے کہ اسرائیلی افواج جنوبی لبنان میں گھروں کی منظم تباہی اور انہیں مسمار کرنے کے ذریعے اپنی خلاف ورزیوں اور حملوں کا سلسلہ جاری رکھے ہوئے ہیں۔

لبنانی فوج کے مطابق، اسرائیلی حملوں کا تسلسل موجودہ معاہدوں کے مطابق فوج کی مکمل تعیناتی میں رکاوٹ بن رہا ہے۔ فوج نے بتایا کہ اسرائیلی افواج کفر تبنیت، النبطیہ الفوقا اور زوطر الغربیہ میں لبنانی فوج کی چوکیوں کے قریب فائرنگ کر رہی ہیں، جیسا کہ لبنانی خبر رساں ایجنسی نے بیان میں کہا۔

لبنانی فوج نے مزید بتایا کہ اسرائیلی افواج نے سرحدی علاقوں میں ملبے پر قبضہ کر لیا ہے، مرجعیون کے علاقے مرکبا میں نیشنل لٹانی ریور اتھارٹی کے واٹر پراجیکٹ کو دھماکے سے اڑا دیا، اور عیترون - بنت جبیل کے اطراف میں قدیم زیتون کے درختوں اور وسیع زرعی اراضی کو جلا دیا۔ یہ سب کارروائیاں کفر تبنیت، النبطیہ الفوقا اور زوطر الغربیہ میں فوجی چوکیوں کے قریب فائرنگ کے ساتھ ہو رہی ہیں، جس سے فوج کے فرائض کی انجام دہی متاثر ہو رہی ہے۔

فوج نے مزید کہا کہ لبنانی فوج زوطر الغربیہ میں شہریوں کی واپسی کے عمل کی نگرانی جاری رکھے ہوئے ہے اور وہاں شہریوں کی حفاظت کے لیے اپنے فرائض انجام دے رہی ہے، جبکہ فرون اور صریفا میں بھی فوجی سرگرمیاں جاری ہیں، جو لبنان کے لیے قائم خصوصی عسکری رابطہ گروپ کے ساتھ ہم آہنگی سے ہو رہی ہیں۔
یاد رہے کہ لبنانی فوج کے سربراہ جوزف عون نے اپنی حالیہ امریکہ یاترا کے دوران صدر ڈونلڈ ٹرمپ کو ایک منصوبہ پیش کیا تھا، جس کا مقصد اسلحہ صرف ریاست کے پاس مرکوز کرنا اور حزب اللہ کی آزاد عسکری حیثیت کا خاتمہ ہے، تاکہ لبنانی-اسرائیلی معاہدوں پر عمل درآمد اور ریاستی عملداری کو پورے ملک میں بحال کیا جا سکے۔