ریاض کی جیلوں میں 15 تعلیمی کمپیوٹر لیبز کا افتتاح

سعودی محکمہ جیل خانہ جات نے ریاض ریجن کی جیلوں میں 15 تعلیمی کمپیوٹر لیبز کا افتتاح کیا ہے، جس میں جیلوں کے ریجنل ڈائریکٹر اور امام محمد بن سعود اسلامی یونیورسٹی کے متعدد ماہرین شریک ہوئے۔

ان لیبز کا قیام محکمہ کی جانب سے جیلوں اور اصلاحی مراکز میں ڈیجیٹل تعلیم و تربیت کے نظام کو فروغ دینے کی کوششوں کا حصہ ہے، جس کا مقصد قیدیوں کو اپنی جامعاتی تعلیم مکمل کرنے اور منظور شدہ تربیتی و تعلیمی پروگراموں میں شرکت کے مواقع فراہم کرنا ہے۔

اسی حوالے سے محکمہ جیل خانہ جات نے اس عزم کا اعادہ کیا ہے کہ وہ قیدیوں کے لیے ایک مکمل تعلیمی ماحول فراہم کرنے کے لیے کوشاں ہے، جو جدید ٹیکنالوجی کے تقاضوں سے ہم آہنگ ہو اور قیدیوں کی تربیت و سماجی انضمام میں مددگار ثابت ہو، تاکہ وہ سزا پوری ہونے کے بعد معاشرے میں بہتر طور پر واپس آ سکیں۔