سعودی کسٹمز نے ایک ہفتے میں 1073 ممنوعہ اشیا ضبط کیں

سعودی عرب کے زمینی، بحری اور فضائی کسٹمز نے اعلان کیا ہے کہ ایک ہفتے کے دوران 1073 ممنوعہ اشیا ضبط کی گئی ہیں۔ یہ کارروائیاں زکوة، ٹیکس اور کسٹمز اتھارٹی (زاتکا) کی جانب سے سیکیورٹی کو مضبوط بنانے اور معاشرے کو ہر طرح کی ممنوعہ اشیا سے محفوظ رکھنے کی مسلسل کوششوں کا حصہ ہیں۔

ضبط کی گئی اشیا میں 70 اقسام کی منشیات شامل ہیں، جن میں حشیش، کوکین، ہیروئن، شبو، کیپٹاگون گولیاں اور دیگر شامل ہیں۔ اس کے علاوہ 216 اقسام کی ممنوعہ اشیا بھی پکڑی گئیں۔

کسٹمز حکام نے 888 بار تمباکو اور اس کی مصنوعات کی اسمگلنگ ناکام بنائی، جبکہ 13 بار مالی رقوم اور ایک بار اسلحہ و اس سے متعلقہ سامان ضبط کیا گیا۔

زاتکا نے اس عزم کا اعادہ کیا ہے کہ وہ مملکت کی درآمدات و برآمدات پر کسٹمز کنٹرول مزید سخت کرے گی تاکہ معاشرتی تحفظ کو یقینی بنایا جا سکے، اور اس مقصد کے لیے متعلقہ اداروں کے ساتھ تعاون جاری رکھا جائے گا۔

زاتکا نے عوام سے اپیل کی ہے کہ وہ اسمگلنگ کی روک تھام اور قومی معیشت کے تحفظ کے لیے تعاون کریں۔ اس مقصد کے لیے سیکیورٹی شکایات کے لیے مخصوص نمبر (1910)، ای میل ([email protected]) یا بین الاقوامی نمبر (009661910) پر رابطہ کیا جا سکتا ہے۔ اتھارٹی ان ذرائع کے ذریعے موصول ہونے والی اسمگلنگ اور کسٹمز قوانین کی خلاف ورزیوں سے متعلق اطلاعات کو مکمل رازداری کے ساتھ وصول کرتی ہے، اور درست اطلاع دینے والے کو مالی انعام بھی دیا جاتا ہے۔