سعودی عرب میں معمول سے زیادہ بارشوں کی پیش گوئی

قومی مرکز برائے موسمیات نے توقع ظاہر کی ہے کہ نومبر 2026 سے جنوری 2027 کے دوران سعودی عرب کے کئی علاقوں میں معمول سے زیادہ بارشیں ہوں گی، جن کی شدت درمیانے سے شدید تک ہو سکتی ہے، جو موسمیاتی اوسط میں متوقع تبدیلی کے مطابق ہے۔

مرکز کے مطابق، نومبر کے مہینے میں شمالی سرحدی علاقہ، القصیم، ریاض، مشرقی ریجن اور مکہ مکرمہ کے کچھ حصوں میں شدید بارشوں کا امکان ہے، جبکہ تبوک، الجوف، حائل، باحہ، عسیر اور نجران کے بعض علاقوں میں درمیانے سے بہت زیادہ بارشیں متوقع ہیں۔

رپورٹ میں مزید کہا گیا ہے کہ دسمبر کے دوران جازان، عسیر، باحہ، نجران اور مکہ مکرمہ، ریاض، مشرقی ریجن اور شمالی سرحدی علاقے کے کچھ حصوں میں بھی معمول سے زیادہ بارشیں متوقع ہیں، جن کی شدت درمیانے سے شدید تک ہو سکتی ہے۔

توقعات کے مطابق جنوری 2027 میں بھی جازان، باحہ، عسیر، مکہ مکرمہ، نجران، ریاض، مشرقی ریجن، القصیم اور مدینہ منورہ و شمالی سرحدی علاقے کے کچھ حصوں میں معمول سے زیادہ بارشیں ہوں گی، جن کی شدت درمیانے سے شدید تک ہو سکتی ہے۔

درجہ حرارت کے حوالے سے پیش گوئی میں بتایا گیا ہے کہ آئندہ تین ماہ کے دوران سعودی عرب کے تمام علاقوں میں سطحی درجہ حرارت معمول سے زیادہ رہنے کا امکان ہے، جبکہ عسیر، نجران اور ریاض کے بعض حصوں میں درجہ حرارت میں زیادہ سے زیادہ دو ڈگری سینٹی گریڈ تک اضافہ ہو سکتا ہے۔