سعودی عرب میں شدید گرمی اور گرد آلود ہوائیں متوقع

محکمہ موسمیات نے اپنی آج کی رپورٹ میں پیش گوئی کی ہے کہ مملکت کے مشرقی علاقے اور مکہ مکرمہ، مدینہ منورہ اور ریاض کے بعض حصوں میں موسم شدید گرم رہے گا۔ ان علاقوں سمیت قصیم، شمالی سرحدی علاقہ اور تبوک کے کچھ حصوں میں گرد آلود تیز ہوائیں چلنے کا امکان ہے، جس سے مکہ مکرمہ اور مدینہ منورہ کے ساحلی علاقوں میں حد نگاہ تقریباً ختم ہو سکتی ہے۔ اسی طرح جازان اور عسیر کے بعض حصوں میں گرج چمک کے ساتھ بارش اور تیز ہواؤں کا امکان ہے، جبکہ مشرقی ریجن کے جنوبی حصوں اور نجران کے کچھ علاقوں میں بھی بارش اور تیز ہوائیں متوقع ہیں۔

رپورٹ کے مطابق بحیرہ احمر کے شمالی اور وسطی حصے میں سطحی ہوائیں شمال مغربی سے شمال کی سمت 25 تا 55 کلومیٹر فی گھنٹہ کی رفتار سے چلیں گی۔

جبکہ جنوبی حصے میں ہوائیں مغربی سے شمال مغربی سمت 12 تا 40 کلومیٹر فی گھنٹہ کی رفتار سے چلیں گی، جو گرج چمک کے ساتھ بارش کے دوران 50 کلومیٹر فی گھنٹہ سے تجاوز کر سکتی ہیں۔ شمالی اور وسطی حصے میں موجوں کی اونچائی ڈیڑھ سے اڑھائی میٹر تک ہوگی، جبکہ جنوبی حصے میں یہ نصف میٹر سے ڈیڑھ میٹر اور بارش کے دوران دو میٹر سے زیادہ ہو سکتی ہے۔ شمالی اور وسطی حصے میں سمندر درمیانے سے بلند موجوں والا، اور جنوبی حصے میں درمیانے سے بلند موجوں والا ہو جائے گا۔