کویت کا سعودی عرب سے مکمل اظہارِ یکجہتی اور حمایت

کویت نے ان حملوں کی مذمت میں اقوام متحدہ کی سلامتی کونسل کے ارکان کے بیان کا خیرمقدم کیا ہے جو حوثی ملیشیا نے 13 جولائی سے سعودی عرب پر اور 22 جولائی سے تجارتی بحری جہازوں پر کیے۔

کویتی وزارت خارجہ کے بیان میں کہا گیا ہے کہ وہ اس بیان میں شامل اس امر کی مکمل قدر کرتی ہے جس میں بین الاقوامی قانون اور متعلقہ سلامتی کونسل کی قراردادوں، بالخصوص قرارداد نمبر 2216 کی پابندی، یمن کی خودمختاری، آزادی اور وحدتِ ارضی کا احترام اور علاقائی سلامتی و بحری جہاز رانی کی آزادی کو لاحق خطرات کی مذمت پر زور دیا گیا ہے۔

وزارت نے سعودی عرب کے ساتھ کویت کی مکمل یکجہتی اور اس کی خودمختاری و سلامتی کے تحفظ کے لیے کیے گئے تمام اقدامات کی حمایت کا اعادہ کیا۔ ساتھ ہی کویت نے یمن کی قانونی حکومت اور اقوام متحدہ کے سیکریٹری جنرل کے خصوصی ایلچی کی جانب سے یمن میں امن و استحکام کے قیام کی کوششوں کی بھی حمایت کی۔

واضح رہے کہ سلامتی کونسل کی قرارداد 2216 کے تحت یمن کے استحکام میں رکاوٹ ڈالنے والے افراد، جن میں حوثی رہنما عبدالملک الحوثی بھی شامل ہیں، پر اسلحہ کی فراہمی پر پابندی، اثاثے منجمد کرنے اور سفری پابندیاں عائد کی گئی ہیں۔