ابہا، طائف اور خمیس مشیط میں ایمرجنسی الرٹ جاری

سعودی محکمہ سول ڈیفنس نے اعلان کیا ہے کہ ابہا شہر میں ہنگامی صورتحال کے پیش نظر قومی انتباہی پلیٹ فارم سے الرٹ جاری کیا گیا ہے۔

اسی طرح، طائف اور خمیس مشیط میں بھی ایمرجنسی الرٹ جاری کیا گیا ہے۔

محکمہ نے شہریوں پر زور دیا ہے کہ وہ مکمل سکون اور احتیاط کے ساتھ سرکاری ہدایات پر عمل کریں، فوری طور پر قریبی محفوظ مقام (کسی عمارت یا اندرونی کمرے میں کھڑکیوں سے دور) چلے جائیں اور خطرہ ختم ہونے تک وہیں رہیں۔ خطرہ ختم ہونے تک گھر یا عمارت سے باہر نہ نکلیں، کھلی جگہوں اور شیشے سے دور رہیں، بالکونی یا چھت پر ہرگز نہ جائیں۔ اگر کوئی باہر موجود ہو تو قریبی عمارت میں داخل ہو جائے یا کسی مضبوط دیوار کے پیچھے پناہ لے، ہجوم اور ویڈیو بنانے سے مکمل گریز کرے، اور وارننگ موصول ہونے پر خطرناک مقامات سے دور رہے۔ اگر گاڑی میں ہوں تو سڑک کے کنارے، پلوں اور بلند عمارتوں سے دور گاڑی روک لیں۔ کسی بھی خطرے کی صورت میں مکہ مکرمہ، مدینہ منورہ، ریاض اور مشرقی ریجن میں ایمرجنسی نمبر 911 اور باقی علاقوں میں 998 پر رابطہ کریں اور سرکاری ذرائع سے جاری ہدایات پر عمل کریں۔

محکمہ نے یہ بھی خبردار کیا ہے کہ میزائل یا ڈرون حملوں سے متعلقہ تصاویر یا معلومات کی اشاعت یا شیئرنگ قانونی کارروائی کا باعث بن سکتی ہے۔