دیوان مظالم میں مصنوعی ذہانت کے نظم و نسق کا فریم ورک منظور

دیوان مظالم کے سربراہ اور مجلس القضاء الاداری کے صدر ڈاکٹر علی بن احمد الاحیدب نے ادارے میں مصنوعی ذہانت کے نظام کے استعمال کے لیے نظم و نسق کا فریم ورک منظور کر لیا ہے۔

دیوان مظالم کے سرکاری ایکس اکاؤنٹ پر جاری بیان کے مطابق یہ اقدام ریاض میں منعقدہ یونیسکو کے چوتھے عالمی فورم برائے اخلاقیاتِ مصنوعی ذہانت کے موقع پر سامنے آیا ہے۔ اس فریم ورک کا مقصد عدالتی و انتظامی امور اور ادارے کے ڈیجیٹل پلیٹ فارمز میں مصنوعی ذہانت کے نظام کے استعمال کو منظم کرنا، اس کے ذمہ دارانہ اور محفوظ استعمال کو یقینی بنانا، ڈیٹا اور معلومات کا تحفظ کرنا اور متعلقہ قومی قوانین و پالیسیوں کی پاسداری کو فروغ دینا ہے۔

ڈاکٹر الاحیدب نے کہا کہ مملکت میں مصنوعی ذہانت کی اخلاقیات اب صرف نظری اصول نہیں رہیں بلکہ وہ قومی نظم و نسق کے عملی حصہ بن چکی ہیں۔ انہوں نے واضح کیا کہ دیوان مظالم اس ٹیکنالوجی سے استفادے اور اپنے عملے کو اس کے عدالتی و انتظامی دائرے میں استعمال کی تربیت دینے کے لیے کوشاں ہے، جو کہ 2026 کو مصنوعی ذہانت کا سال قرار دینے اور دیوان مظالم 2030 کے اہداف کے حصول کی کوششوں کا حصہ ہے۔

یہ امر قابل ذکر ہے کہ دیوان مظالم نے رواں سال مارچ میں مصنوعی ذہانت کے نظام کے استعمال کے اصولوں کی دستاویز بھی جاری کی تھی، جس کا مقصد ادارے کے مختلف شعبوں میں ان نظاموں کی تیاری اور استعمال کو منظم کرنا اور اس سے متعلق ضوابط و اخلاقیات وضع کرنا تھا۔

نئے نظم و نسق کا فریم ورک متعلقہ اداروں کی جانب سے جاری کردہ پالیسیوں اور رہنما اصولوں کے ساتھ ساتھ دیوان کے اندرونی ضوابط پر بھی مبنی ہے۔ اس میں ڈیجیٹل عدالتی خدمات مرکز کے مصنوعی ذہانت اور ابھرتی ہوئی ٹیکنالوجیز کے دفتر کی جانب سے نظرثانی اور اپ ڈیٹ کا طریقہ کار بھی شامل ہے، تاکہ اس شعبے میں تیز رفتار پیش رفت کے ساتھ ہم آہنگی برقرار رکھی جا سکے اور ذمہ دارانہ استعمال کے اصولوں سے متعلق آگاہی کو فروغ دیا جا سکے۔

اعرض التغريدة على منصة X