تکنیکی تربیت ادارے نے 2026 میں 3 ہزار سے زائد نجی تربیتی پروگرام منظور کیے

سعودی ادارہ برائے تکنیکی و پیشہ ورانہ تربیت نے رواں سال 2026 کے دوران مملکت میں نجی تربیتی اداروں کے لیے مجموعی طور پر 3313 مختلف تربیتی پروگراموں کی منظوری دی ہے۔

انتظامیہ نے واضح کیا کہ نجی تربیتی شعبے میں پروگراموں کی منظوری ماہرین کی ٹیم کی جانچ کے بعد دی جاتی ہے، جن کی تعداد 1200 سے زائد ہے۔ یہ ماہرین ادارے کے اندر اور باہر سے تعلق رکھتے ہیں اور منظور شدہ ضوابط کے مطابق ہر پروگرام کا جائزہ لیتے ہیں۔ اس عمل کی نگرانی اور پیروی ماہرین پر مشتمل ایک خصوصی ٹیم کرتی ہے تاکہ تربیتی پروگرام مقررہ معیار اور تقاضے پورے کریں۔

انتظامیہ کے مطابق نجی تربیتی اداروں کی جانب سے ڈپلومہ، ترقیاتی اور اہلیتی پروگراموں کی منظوری کے لیے درخواستیں جنرل ایڈمنسٹریشن فار پرائیویٹ ٹریننگ کو موصول ہوتی ہیں۔ بعد ازاں جنرل ایڈمنسٹریشن فار کریکولم ان درخواستوں کا جائزہ لے کر مطلوبہ دستاویزات، نمونوں اور پروگرام کے مواد کے معیار کو یقینی بناتی ہے۔ اگر کسی درخواست میں کوئی کمی ہو تو اسے متعلقہ ادارے کو واپس بھیج دیا جاتا ہے تاکہ اصلاح کے بعد دوبارہ جمع کرائی جا سکے۔

یہ طریقہ کار ادارہ برائے تکنیکی و پیشہ ورانہ تربیت کے نگرانی کردار کے مطابق وضع کیا گیا ہے، جو نجی تربیتی شعبے کے لیے پالیسی سازی اور اس اہم شعبے کی معاونت کے لیے اقدامات کرتا ہے۔ اس کے ساتھ ساتھ تربیتی اداروں کی کارکردگی اور نتائج کے معیار کو بھی یقینی بنایا جاتا ہے۔ اس وقت مملکت بھر میں 2800 سے زائد نجی تربیتی ادارے لائسنس یافتہ ہیں۔