سعودی عرب میں آج بارش اور تیز ہواؤں کی پیش گوئی

محکمہ موسمیات نے آج کے موسم کی رپورٹ میں پیش گوئی کی ہے کہ نجران، جازان، عسیر اور باحہ کے بعض حصوں میں گرج چمک کے ساتھ بارش، ژالہ باری اور تیز ہوائیں چلنے کا امکان ہے۔ یہ سلسلہ مکہ مکرمہ کے پہاڑی علاقوں تک پھیل سکتا ہے۔ ان علاقوں کے مشرقی حصوں میں گرد و غبار اور تیز ہواؤں کے باعث حد نگاہ کم ہو سکتی ہے، خصوصاً وادی الدواسر سے شرورہ جانے والے راستے پر۔ اس کے علاوہ، مشرقی ریجن کے کچھ حصوں میں موسم گرم سے شدید گرم رہنے کی توقع ہے۔

رپورٹ کے مطابق بحیرہ احمر میں شمالی اور وسطی حصے میں سطحی ہوائیں شمال مغربی سے شمالی سمت میں جبکہ جنوبی حصے میں جنوب مغربی سے جنوب مشرقی سمت میں 12 سے 36 کلومیٹر فی گھنٹہ کی رفتار سے چلیں گی، جو گرج چمک کے ساتھ بارش کے دوران 50 کلومیٹر فی گھنٹہ سے بھی تجاوز کر سکتی ہیں۔ لہریں آدھے میٹر سے ڈیڑھ میٹر تک بلند ہوں گی اور جنوبی حصے میں گرج چمک کے ساتھ بارش کے دوران دو میٹر سے بھی زیادہ ہو سکتی ہیں۔ اس دوران سمندر کی کیفیت ہلکی سے درمیانی اور جنوبی حصے میں گرج چمک کے ساتھ بارش کے دوران موجزن رہ سکتی ہے۔

خلیج عرب میں شمالی حصے میں سطحی ہوائیں شمال مغربی سے مغربی سمت میں 15 سے 35 کلومیٹر فی گھنٹہ کی رفتار سے جبکہ وسطی اور جنوبی حصے میں جنوب مشرقی سے جنوب مغربی سمت میں 10 سے 25 کلومیٹر فی گھنٹہ کی رفتار سے چلیں گی۔ شمالی حصے میں لہریں آدھے میٹر سے ڈیڑھ میٹر تک اور وسطی و جنوبی حصے میں آدھے میٹر سے ایک میٹر تک بلند ہوں گی۔ سمندر کی کیفیت ہلکی سے درمیانی موج کی رہے گی۔