سعودی عرب کا عالمی ریٹائرمنٹ انڈیکس میں بارہواں نمبر

سعودی عرب نے مارش اور سی ایف اے انسٹی ٹیوٹ کے عالمی ریٹائرمنٹ انڈیکس 2026 میں خلیجی ممالک میں پہلی اور دنیا بھر میں بارہویں پوزیشن حاصل کی ہے۔ اس جائزے میں 55 ممالک کے پنشن سسٹمز کا موازنہ کیا گیا۔

مملکت کا مجموعی اسکور 73.2 رہا جو 100 میں سے ہے، جبکہ 2025 میں یہ اسکور 67.6 تھا۔ اس سے ظاہر ہوتا ہے کہ عالمی سطح پر سعودی عرب کے پنشن نظام کی درجہ بندی میں نمایاں بہتری آئی ہے۔

سعودی عرب نے اس فہرست میں قابل ذکر ترقی کی ہے، 2022 میں 44 ممالک میں 27 ویں پوزیشن سے 2026 میں 55 ممالک میں 12 ویں نمبر پر آگیا، یعنی 15 درجے بہتری آئی، حالانکہ اس بار جائزے میں مزید ممالک شامل تھے۔

مملکت نے انڈیکس کے تینوں بنیادی شعبوں میں بہتری دکھائی۔ شفافیت اور اعتماد کے شعبے میں 83.5 اسکور کیا، جو گزشتہ سال کے مقابلے میں 9.3 پوائنٹس زیادہ ہے، اور اس شعبے میں سب سے اعلیٰ (A) درجہ حاصل کیا۔

استحکام کے شعبے میں اسکور 54.6 سے بڑھ کر 61.2 ہوگیا، جبکہ فوائد کی کفایت کے شعبے میں اسکور 75 سے بڑھ کر 77.2 رہا، یوں مجموعی طور پر (B) کیٹیگری برقرار رہی۔

سعودی عرب نے مجموعی اسکور میں برطانیہ، کینیڈا، فرانس، جرمنی، بیلجیم، آئرلینڈ اور ہانگ کانگ جیسے ممالک کو پیچھے چھوڑ دیا اور خلیجی ممالک میں سب سے زیادہ اسکور حاصل کیا۔

رپورٹ کے مطابق، مملکت کی ترقی کی وجہ شفافیت میں بہتری، ریگولیٹری اور گورننس فریم ورک کی بہتری، شرکاء کے حقوق کے تحفظ، ڈیٹا اپڈیٹ اور ان سے رابطے میں اضافہ ہے۔

مارش اور سی ایف اے انسٹی ٹیوٹ کا عالمی ریٹائرمنٹ انڈیکس پنشن سسٹمز کے بین الاقوامی آزاد حوالہ جات میں سے ایک ہے، جو تین بنیادی شعبوں میں تقسیم شدہ 50 سے زائد ذیلی اشاریوں پر مشتمل ہے اور دنیا کی تقریباً 66 فیصد آبادی کا احاطہ کرتا ہے۔