سعودی جامعات میں مصنوعی ذہانت کے خصوصی پروگرام، 30 ہزار طلبہ کی تربیت

وزیر مواصلات و انفارمیشن ٹیکنالوجی انجینئر عبداللہ السواحه نے بتایا ہے کہ وزارت نے سعودی جامعات میں مصنوعی ذہانت کے خصوصی پروگرام متعارف کرائے ہیں اور اس شعبے میں تقریباً 30 ہزار باصلاحیت نوجوانوں کی تربیت جاری ہے۔

عبداللہ السواحه کے مطابق مملکت میں 80 سے زائد ٹیکنیکل اسکولیں قائم ہیں جہاں طلبہ کو پروفیشنل سرٹیفکیٹس کے لیے تربیت دی جاتی ہے، جس سے جدید ٹیکنالوجی کے شعبوں میں قومی صلاحیتوں کو فروغ مل رہا ہے۔

وزیر نے یہ بھی بتایا کہ مملکت میں ڈیجیٹل معیشت کی شرح نمو 75 فیصد سے زائد رہی ہے، جو کہ جی 20 ممالک کی معیشتوں کے مقابلے میں دو گنا تک زیادہ ہے۔

شکایات میں کمی اور خدمات میں بہتری

مواصلاتی خدمات کے حوالے سے عبداللہ السواحه نے کہا کہ ٹیلی کمیونیکیشن کمپنیوں کو صارف کی شکایت کا جواب دینے کے لیے 5 دن کی مدت دی گئی ہے اور انہیں اس پر عمل کرنا لازم ہے۔

انہوں نے مزید بتایا کہ ٹیلی کمیونیکیشن کمپنیوں کے خلاف شکایات کی تعداد ایک ملین سے کم ہو کر مختلف سہ ماہیوں میں نمایاں کمی کے ساتھ بعض اوقات ایک لاکھ سے بھی کم رہ گئی ہے، جبکہ ہر سہ ماہی میں شکایات کی شرح میں تقریباً 15 فیصد کمی آ رہی ہے۔

اسی حوالے سے صارفین کو شکایات درج کرانے کے لیے متعدد ذرائع فراہم کیے گئے ہیں اور انہیں مقررہ مدت میں شکایت کے حل کا حق بھی حاصل ہے۔