سعودی عرب میں آج گرج چمک کے ساتھ بارش اور تیز ہوائیں متوقع

محکمہ موسمیات نے اپنے منگل کے موسم رپورٹ میں بتایا ہے کہ آج جازان، عسیر، نجران، ریاض اور مشرقی علاقوں کے کچھ حصوں میں گرج چمک کے ساتھ بارش کا امکان ہے، جبکہ ان علاقوں میں تیز ہوائیں اور گرد و غبار کا سلسلہ بھی جاری رہے گا۔ اسی طرح مدینہ منورہ اور مکہ مکرمہ کے کچھ حصے بھی متاثر ہوں گے، اور ساحلی شاہراہ پر جازان کی سمت حد نگاہ تقریباً ختم ہو سکتی ہے۔

محکمہ موسمیات کے مطابق مشرقی، وسطی اور شمالی سرحدی علاقوں میں موسم گرم سے شدید گرم رہنے کی توقع ہے۔

رپورٹ میں بتایا گیا ہے کہ بحیرہ احمر میں سطحی ہوائیں شمال مغرب سے جنوب مغرب کی سمت 10 سے 34 کلومیٹر فی گھنٹہ کی رفتار سے چلیں گی، جبکہ شمالی اور جنوبی حصوں میں یہ رفتار 50 کلومیٹر فی گھنٹہ تک پہنچ سکتی ہے۔ جنوبی حصے میں گرج چمک کے ساتھ بارش کے دوران ہوائیں تیز ہوں گی۔ درمیانی حصے میں ہوائیں 15 سے 45 کلومیٹر فی گھنٹہ کی رفتار سے چل سکتی ہیں اور موجوں کی اونچائی آدھے میٹر سے ڈیڑھ میٹر تک، جبکہ بعض اوقات دو میٹر سے بھی زیادہ ہو سکتی ہے۔ مجموعی طور پر سمندر کی کیفیت ہلکی سے درمیانی رہے گی، تاہم درمیانی حصے میں بارش کے دوران موجیں بلند ہو سکتی ہیں۔

خلیج عرب میں ہوائیں شمال مغرب سے جنوب مغرب کی سمت 10 سے 30 کلومیٹر فی گھنٹہ کی رفتار سے چلیں گی، جو جنوبی حصے میں بارش کے ساتھ 50 کلومیٹر فی گھنٹہ تک پہنچ سکتی ہیں۔ موجوں کی اونچائی آدھے میٹر سے ایک میٹر تک، جبکہ بارش کے دوران دو میٹر سے زیادہ ہو سکتی ہے۔ مجموعی طور پر سمندر کی کیفیت ہلکی رہے گی، تاہم جنوبی حصے میں بارش کے دوران موجیں بلند ہو سکتی ہیں۔