وزارتِ سرمایہ کاری کو منی لانڈرنگ کمیٹی میں شامل کرنے سمیت کابینہ کے 10 اہم فیصلے

خادم الحرمین الشریفین کے ولی عہد اور وزیر اعظم شہزادہ محمد بن سلمان بن عبدالعزیز نے آج جدہ میں کابینہ اجلاس کی صدارت کی۔

اجلاس کے آغاز میں، ولی عہد نے کابینہ کو پاکستان کے وزیر اعظم محمد شہباز شریف سے ہونے والی ٹیلیفونک گفتگو اور امریکی فوج کے سینٹرل کمانڈ کے سربراہ ایڈمرل بریڈ کوپر سے ملاقات کے نتائج سے آگاہ کیا، جن میں خطے کی تازہ صورتحال پر تبادلہ خیال کیا گیا۔

کابینہ نے حوثی ملیشیا کی جانب سے مملکت میں شہریوں اور شہری تنصیبات پر مسلسل اور دانستہ حملوں کی شدید مذمت کی۔ کابینہ نے اس امر پر زور دیا کہ مملکت کی سلامتی، ارضی سالمیت اور وسائل کا تحفظ ایک ناقابلِ سمجھوتہ اصول ہے اور سعودی عرب کو اپنی خودمختاری، شہریوں، مقیمین اور اہم مفادات کے دفاع کا مکمل حق حاصل ہے، جیسا کہ اقوام متحدہ کے چارٹر اور بین الاقوامی قوانین میں درج ہے۔

وزیر اطلاعات سلمان بن یوسف الدوسری نے اجلاس کے بعد سعودی خبر رساں ایجنسی کو بتایا کہ کابینہ نے علاقائی و عالمی حالات اور سعودی عرب کی جانب سے امن و استحکام کے فروغ کے لیے کی جانے والی کوششوں کا جائزہ لیا۔ انہوں نے کہا کہ مملکت بین الاقوامی مسائل کے حل کے لیے مکالمے کے اصول پر کاربند ہے اور عالمی اداروں و تنظیموں کے ساتھ تعاون کو فروغ دے رہی ہے تاکہ مشترکہ عالمی چیلنجز کا اجتماعی طور پر مقابلہ کیا جا سکے۔

کابینہ نے بھارت کے دارالحکومت نئی دہلی میں ہونے والی 18ویں برکس سربراہی کانفرنس میں سعودی عرب کی بطور مدعو ملک شرکت کے نتائج کا بھی جائزہ لیا۔ اجلاس میں اس بات پر زور دیا گیا کہ سعودی عرب دنیا کے مختلف ممالک کے ساتھ باہمی تعاون کو فروغ دینے اور عالمی ترقی، استحکام اور خوشحالی کے لیے پرعزم ہے، تاکہ بین الاقوامی ادارے اپنی ذمہ داریاں بہتر طور پر ادا کر سکیں۔

کابینہ نے بین الاقوامی ایٹمی توانائی ایجنسی کی 70ویں جنرل کانفرنس میں سعودی عرب کے اس موقف کا اعادہ کیا کہ مملکت نے دہائیوں سے توانائی کا قابلِ اعتماد ذریعہ اور عالمی منڈیوں کے استحکام میں اہم کردار ادا کیا ہے۔ اس کے ساتھ ساتھ، سعودی عرب مختلف ذرائع سے قومی توانائی کے متنوع اور پائیدار نظام کی تشکیل کے لیے کوشاں ہے، جس میں جوہری توانائی کو بھی عالمی معاہدوں کے مطابق شامل کیا جا رہا ہے۔

وزیر اطلاعات نے بتایا کہ کابینہ نے یونیسکو کے زیر اہتمام مصنوعی ذہانت کی اخلاقیات پر چوتھے عالمی فورم کے شرکاء کو خوش آمدید کہا، جو اس وقت سعودی عرب میں جاری ہے۔ یہ فورم مملکت کی ابھرتی ہوئی ٹیکنالوجیز پر کثیر الجہتی بین الاقوامی مکالمے کے فروغ اور مصنوعی ذہانت کے ذمہ دارانہ و اخلاقی استعمال اور انسانی اقدار کے تحفظ کے عزم کا حصہ ہے، تاکہ ایک جامع اور پائیدار ڈیجیٹل مستقبل تشکیل دیا جا سکے۔

کابینہ نے اپنے ایجنڈے میں شامل مختلف امور کا جائزہ لیا، جن میں کچھ معاملات پر مجلس شوریٰ نے بھی غور کیا تھا۔ اس کے علاوہ، سیاسی و سلامتی امور، اقتصادی و ترقیاتی امور، کابینہ کی جنرل کمیٹی اور ماہرین کی کمیٹی کی سفارشات بھی زیر بحث آئیں۔ اجلاس میں مندرجہ ذیل فیصلے کیے گئے:

اول:

وزیر سرمایہ کاری یا ان کے نمائندے کو آئرلینڈ کے ساتھ براہ راست سرمایہ کاری کے فروغ کے لیے مفاہمتی یادداشت پر مذاکرات اور دستخط کا اختیار دیا گیا۔

دوم:

سعودی عرب اور بین الاقوامی ادارہ برائے داخلی آڈٹرز کے درمیان ہیڈکوارٹر معاہدے کی منظوری دی گئی۔

سوم:

سعودی وزارت صنعت و معدنی وسائل اور قازقستان کی وزارت صنعت و تعمیرات کے درمیان معدنی وسائل کے شعبے میں مفاہمتی یادداشت کی منظوری دی گئی۔

چہارم:

شہزادہ فہد نیشنل لائبریری کے بورڈ آف ٹرسٹیز کے سربراہ یا ان کے نمائندے کو بحرین کے اسٹریٹجک، بین الاقوامی اور انرجی اسٹڈیز سینٹر کے ساتھ تعاون کی مفاہمتی یادداشت پر مذاکرات اور دستخط کا اختیار دیا گیا۔

پنجم:

ہیئتِ بیمہ کے چیئرمین یا ان کے نمائندے کو کویت کی انشورنس ریگولیٹری یونٹ کے ساتھ انشورنس اور ری انشورنس کے شعبے میں تعاون اور معلومات کے تبادلے کی مفاہمتی یادداشت پر مذاکرات اور دستخط کا اختیار دیا گیا۔

ششم:

قومی انٹرپرینیورشپ اور چھوٹے و درمیانے درجے کے اداروں کی حکمت عملی کی منظوری دی گئی۔

ہفتم:

وزارت سرمایہ کاری کو منی لانڈرنگ کے خلاف مستقل کمیٹی کی رکنیت میں شامل کرنے کی منظوری دی گئی۔

ہشتم:

جامعہ کنگ عبدالعزیز کے گزشتہ مالی سال کے حتمی اکاؤنٹس کی منظوری دی گئی۔

نہم:

کابینہ کے ایجنڈے میں شامل متعدد دیگر امور پر ضروری اقدامات کی ہدایت کی گئی، جن میں سرکاری اخراجات اور منصوبہ جات کی کارکردگی کی اتھارٹی، ہیئتِ امر بالمعروف و نہی عن المنکر، مرکزِ اقامہ ممیزہ اور نیشنل ڈیٹ اینڈ ڈیٹس سینٹر کی سالانہ رپورٹس شامل ہیں۔

دہم:

وزارتِ افرادی قوت و سماجی ترقی میں محمد بن علی الشہری کو گریڈ 14 پر ڈائریکٹر جنرل کے عہدے پر ترقی دینے کی منظوری دی گئی۔