بین الاقوامی قانون کی پاسداری عالمی امن کی ضمانت ہے، سعودی عرب

سعودی عرب نے واضح کیا ہے کہ بین الاقوامی قانون اور اقوام متحدہ کے منشور کی پاسداری عالمی امن و سلامتی کے تحفظ اور مسلح تنازعات میں شہریوں کی حفاظت کے لیے بنیادی ستون ہے۔

یہ بات اقوام متحدہ میں سعودی عرب کے مستقل مندوب ڈاکٹر عبدالعزیز الواصل نے بدھ کو سلامتی کونسل کے اجلاس میں کہی، جس کا موضوع تھا: "مسلح تنازعات میں بین الاقوامی قانون کی پاسداری"۔

انہوں نے شہریوں، شہری تنصیبات اور انسانی و طبی شعبے کے کارکنوں کے تحفظ، ریاستوں کی خودمختاری، آزادی اور علاقائی سالمیت کے احترام اور داخلی معاملات میں عدم مداخلت کی ضرورت پر زور دیا۔

انہوں نے کہا کہ بین الاقوامی قانون کا اطلاق بغیر کسی امتیاز یا دہرا معیار اپنائے ہونا چاہیے اور خلاف ورزیوں پر احتساب کو مضبوط بنایا جائے، تاکہ عالمی اصولوں اور ضابطوں کا احترام فروغ پائے۔ انہوں نے بات چیت اور پرامن ذرائع کو ترجیح دینے، ثالثی کی کوششوں کی حمایت اور تنازعات کے حل و انسانی و سکیورٹی اثرات میں کمی پر زور دیا۔

سعودی مندوب نے اس عزم کا اعادہ کیا کہ مملکت بین الاقوامی انسانی قانون کے احترام اور شہریوں کے تحفظ کے لیے اپنی کوششیں جاری رکھے گی اور عالمی امن، استحکام اور تنازعات کے پرامن حل کے لیے بین الاقوامی کوششوں کی حمایت کرے گی۔