بدھ کو گرج چمک کے ساتھ موسلا دھار بارش اور تیز ہوائیں متوقع

محکمہ موسمیات نے اپنے بدھ کے موسم رپورٹ میں پیش گوئی کی ہے کہ جازان، عسیر، باحہ اور مکہ مکرمہ کے کچھ حصوں میں آج درمیانے سے شدید درجے کی گرج چمک کے ساتھ بارشیں جاری رہیں گی، جو سیلابی ریلوں کا سبب بن سکتی ہیں۔ ان بارشوں کے ساتھ ژالہ باری اور گرد و غبار اٹھانے والی تیز ہوائیں بھی متوقع ہیں۔ مدینہ منورہ، حائل، تبوک، الجوف اور شمالی حدود کے کچھ حصوں میں ہلکی سے درمیانے درجے کی بارش کا امکان ہے۔

رپورٹ میں مزید کہا گیا ہے کہ مشرقی ریجن کے کچھ حصوں میں شدید دھند چھانے کا امکان برقرار ہے جبکہ اس کے جنوبی حصوں میں گرج چمک کے ساتھ بارش کی پیش گوئی بھی کی گئی ہے۔

مزید بتایا گیا ہے کہ بحیرہ احمر میں سطحی ہوائیں شمال مغرب سے شمال کی سمت 20 تا 40 کلومیٹر فی گھنٹہ، شمال مغرب سے مغرب کی سمت 15 تا 38 کلومیٹر فی گھنٹہ اور جنوب مشرق سے مشرق کی سمت 10 تا 35 کلومیٹر فی گھنٹہ کی رفتار سے چلیں گی، جو گرج چمک کے ساتھ بارش کے دوران 50 کلومیٹر فی گھنٹہ سے بھی تجاوز کر سکتی ہیں۔ سمندر میں لہریں آدھے میٹر سے ڈیڑھ میٹر تک بلند ہوں گی اور گرج چمک کے ساتھ بارش کے دوران دو میٹر سے بھی زیادہ ہو سکتی ہیں۔ اس دوران سمندر کی حالت ہلکی سے درمیانی اور بارش کے دوران شدید متلاطم رہے گی۔

خلیج عرب میں سطحی ہوائیں شمال مغرب سے شمال کی سمت 10 تا 30 کلومیٹر فی گھنٹہ اور شمال مغرب سے مغرب کی سمت 10 تا 25 کلومیٹر فی گھنٹہ کی رفتار سے چلیں گی۔ لہروں کی اونچائی آدھے میٹر سے ایک میٹر تک رہے گی اور سمندر کی حالت ہلکی متلاطم رہے گی۔